पुण्यातील पावसाचे तीन बळी; ओढ्याला आलेल्या पुरामुळं दुर्घटना

पुणेः पुण्यात कालपासून पावसानं हाहाकार माजवला आहे. रात्री धुमाकूळ घातलेल्या पावसानं पुणेकरांची झोप उडवली आहे. दोन तासात पडलेल्या पावसामुळं पूरसदृश परिस्थिती निर्माण केली होतीय. दौड तालुक्यातील राजेगाव येथे ओढ्याला आलेल्या पुरात काल संध्याकाळी दोन दुचाकीवरील चौघे जण वाहून गेल्याची घटना घडली आहे. तिघांचे मृतदेह सापडले असून एकाचा शोध सुरू आहे.

मिळालेल्या माहितीनुसार, हे चौघेजण खानवटे या गावचे असून राजेगाव येथे कामासाठी आले होते. रात्री घरी परतत असताना ओढ्याला आलेल्या पुरात ते वाहून गेले आहे. ते चौघे जण दोन दुचाकीवरुन ओढ्यावरून चालले होते. वाहून गेलेल्या चौघांपैकी तिघांचे मृतदेह सापडले आहेत. तर अद्याप एकाचा शोध सुरू आहे. इतर मृतदेह शवविच्छेदनासाठी जिल्हा रुग्णालयात पाठवण्यात आले आहेत.

दरम्यान, शहरात बुधवारी रात्री धुमाकूळ घातलेल्या पावसाने गेल्या दहा वर्षातील सर्व विक्रम मोडले. रात्री नऊ ते अकरा या दोन तासात संपूर्ण शहरात धुवाँधार पाऊस पडल्याने पूरसदृश परिस्थिती निर्माण झाली होती. कात्रज भागात काल रात्री अकरा वाजेपर्यंत तब्बल १५१ मिलीमीटर पावसाची नोंद झाली. तर शिवाजीनगरला ९६ मिलीमीटर पाऊस पडला. कात्रज तलाव, टांगेवाला कॉलनीसह आणि अरणेश्वर परिसरातील नागरिकांना घरात पाणी शिरल्याने प्रशासनाला महापालिकेच्या शाळेत हलवावे लागले.

धरणक्षेत्रात पावसाचा जोर कायम; पुण्यातील 'ही' धरणं तुडुंब

आजचा दिवसही पावसाचा

बंगालच्या उपसागरातून आंध्र प्रदेशामध्ये जमिनीवर आलेले अतितीव्र कमी दाबाचे क्षेत्र बुधवारी संध्याकाळी मध्य महाराष्ट्रापर्यंत पोहोचले. हे कमी दाबाचे क्षेत्र गुरुवारी महाराष्ट्रावरच राहणार असल्याने कोकण, मध्य महाराष्ट्रात गुरुवारीही मुसळधार पावसाची शक्यता आहे. पुण्यामध्ये दुपारनंतर मेघगर्जनेसह मध्यम ते मुसळधार स्वरुपाचा पाऊस पडणार असल्याचा इशारा भारतीय हवामानशास्त्र विभागाने दिला आहे.

पुण्यात काही तासांच्या पावसाने मोडले दहा वर्षांतील सगळे विक्रम