‘हॅलो फॉरेस्ट’चा सर्व्हर नादुरुस्त

‘१९२६’ वन विभागाचा टोल फ्री क्रमांक बंद
म. टा. प्रतिनिधी, बारामती
वणवा, अवैध वृक्षतोड, शिकार, रहिवासी क्षेत्रात जंगली प्राणी घुसणे या व अशा अनेक तक्रारी-समस्यांसाठी वन विभागातर्फे नागरिकांच्या हितासाठी व जंगल वाचवण्यासाठी १९२६ हा टोल फ्री क्रमांक उपलब्ध करून देण्यात आला होता, मात्र सर्व्हरमधील तांत्रिक बिघाडामुळे अवघ्या तीन महिन्यांतही ही योजना बंद पडली आहे.
वन्य क्षेत्र किंवा वन्य क्षेत्रालगतचे रहिवासी क्षेत्र येथे वणवा, वृक्षतोड, अतिक्रमण, वन्यजीव शिकार, वस्तीत जंगली प्राणी घुसणे या व अशा अनेक समस्या उद्भवतात. या वेळी वन खात्याच्या नेमक्या कोणत्या यंत्रणेशी संपर्क करायचा याबाबत सामान्य जनतेला फारशी माहिती नसते. त्याचप्रमाणे वन खात्यातर्फे अनेक योजना, उपक्रम राबवले जातात. त्याबाबतही नागरिक अनभिज्ञ असतात. या सर्व तक्रारींचे, समस्यांचे निवारण, हवी असलेली माहिती आदी वन विभागाच्या एकाच दूरध्वनी क्रमांकावरून मिळू शकते. मात्र, ही माहिती चोवीस तास उपलब्ध व्हावी यासाठी १९२६ हा टोल फ्री क्रमांक उपलब्ध करण्यात आला होता. मात्र अवघ्या तीनच महिन्यातच ही सेवा बंद पडल्याचे समोर आले. हा टोल फ्री क्रमांक आयडिया, युनिनॉर, जिओ आदी ठरविक कंपनीच्या मोबाइलवरून काही भागात लागत नसल्याने वन विभागाच्या अधिकाऱ्यांशी संपर्क होऊ शकला नाही. वन विभागातील अधिकाऱ्यांच्या निष्काळजीपणामुळेच ही योजना बंद झाल्याचे काही वन कर्मचाऱ्यांनी ‘मटा’ला सांगितले.
१९२६ या टोल फ्री क्रमांकामुळे उन्हाळ्यात जंगलात वणवा लागल्याची खबर तत्काळ वन विभागाला देण्यासाठी अत्यंत उपयुक्त होती. त्यामुळे हा टोल फ्री क्रमांक राज्यात सर्वत्र कायम कार्यन्वित करण्यात यावा अशी मागणी पर्यावरण तज्ज्ञांनी केली आहे.
..
हा टोल फ्री क्रमांक बंद करण्यात आला नाही. ही सुविधा सुरू आहे. मात्र, काही ठिकाणी सर्व्हरबाबत तांत्रिक अडचण असल्याने सुविधा बंद आहे. याबाबत तातडीने दुरुस्तीचे काम हाती घेण्यात येईल.
- प्रवीण श्रीवास्तव, अप्पर प्रधान मुख्य वन संरक्षक (आयटी)
0000