म. टा. प्रतिनिधी, पुणे
वाहतुकीला अडथळा होईल, अशा पद्धतीने रस्त्यावर उभ्या केल्या जाणाऱ्या बेशिस्त वाहनांची तक्रार करण्यासाठी डेक्कन वाहतूक पोलिस विभागाने ९५२७३३५००९ हा हेल्पलाइन क्रमांक कार्यान्वित केला आहे. यावर नागरिक केव्हाही तक्रार करू शकतात.
डेक्कन परिसरात विशेषत:, नामदार गोपाळ कृष्ण गोखले रस्त्यावर (फर्ग्युसन कॉलेज रोड) पार्किंगची समस्या भेडसावत आहे. त्यामुळे दुहेरी पार्किंग, नो-पार्किंगमध्ये गाडी उभी करणे, पदपथांवर गाडी उभी करणे आदी प्रकार मोठ्या संख्येने होत असल्याचे वृत्त 'महाराष्ट्र टाइम्स'ने दिले होते. त्यानंतर डेक्कन पोलिसांनी ना. गोपाळ कृष्ण गोखले रस्त्यावर शनिवारी 'नो-पार्किंग'मध्ये उभ्या केलेल्या आणि पदपथावर लावलेल्या एकूण २७ वाहनांवर कारवाई केली. त्यांच्याकडून साडेदहा हजार रुपये दंड वसूल केला, अशी माहिती डेक्कन वाहतूक पोलिस विभागाचे निरीक्षक किरण बालवडकर यांनी दिली.