धानोरीत वीजवाहिन्या उघड्यावर

म. टा. प्रतिनिधी, येरवडा

एरंडवणे येथील पदपथावर उच्च क्षमतेच्या वीजवाहिनीवर पाय पडून एक महिला गंभीर झाल्याची घटना सोमवारी घडली. या पार्श्वभूमीवर मंगळवारी धानोरी परिसरात भूमिगत वाहिन्या टाकलेल्या भागाची पाहणी केली असता सर्वच ठिकाणी उच्च क्षमतेच्या वाहिन्या उघड्या असल्याचे दिसून आले. त्यामुळे एरंडवणेसारख्या अपघाताची पुनरावृत्ती होण्याची शक्यता नाकारता येत नाही.

महावितरकडून वीजवाहिन्या भूमिगत करण्यासाठी उपनगरांत अनेक ठिकाणी रस्ते खोदण्यात आले आहे. मात्र वाहिन्या भूमिगत टाकण्याचे काम पूर्ण झाल्यानंतर सर्वच ठिकाणी वीजवाहिन्या उघड्या पडल्या असून अतिरिक्त मीटरच्या वाहिन्या गुंडाळून लोखंडी खांबाला बांधण्यात आले आहे. धानोरी येथील मुंजाबावस्तीत मुख्य रस्त्यावर महावितरणकडून वीजवाहिन्या भूमिगत करण्यासाठी रस्ते खोदण्यात आले आहेत. वाहिन्या भूमिगतचे काम पूर्ण झाल्यानंतर शिस्तबद्ध पद्धतीने वीजजोडणी करणे अपेक्षित आहे. मात्र, जवळपास भूमिगत वाहिन्यांच्या कामाची ठिकठिकाणी पाहणी केली असता अतिरिक्त असलेल्या वीज वाहिन्या न कापता रस्त्यावर गुंडाळून ठेवण्यात आल्या आहेत. त्यामुळे एरंडवणेसारखा प्रकार घडून जीवितहानी होण्याची शक्यता आहे. यामुळे महावितरणने नागरिकांच्या सुरक्षिततेच्या दृष्टीने उघड्या पडलेल्या वीजवाहिन्या योग्य पद्धतीने भूमिगत करून घ्याव्यात, अशी मागणी स्थानिक नागरिकांनी केली आहे.

वीजवाहिन्या उघड्यावर आणि रस्ते खड्ड्यात...

महावितरणकडून शहर आणि उपनगरात ठिकठिकाणी उच्च क्षमतेच्या वीजवाहिन्या भूमिगत करण्याचे काम वेगात चालू आहे. मात्र, अनेक ठिकाणी वीजवाहिन्या भूमिगत करण्याचे काम पूर्ण होऊनही उघड्यावर वाहिन्या पडलेल्या दिसून येतात. तसेच, वाहिन्या टाकण्याचे काम पूर्ण झाल्यानंतर पालिकेकडून खड्डे बुजविला जात नसल्याने नागरिकांना त्रास सहन करावा लागतो.