रेनकोट घालताना इंजिनीयर तरुणीचा विनयभंग

पिंपरीः हिंजवडी आयटी पार्कमधील कंपनीतून घरी जात असताना पाऊस आल्याने रेनकोट घालण्यासाठी थांबलेल्या आयटी अभियंता तरुणीचा दोघांनी विनयभंग केला. बुधवारी सायंकाळी चारच्या सुमारास चांदे-नांदे रोडवर ही घटना घडली. पीडित तरुणी शुक्रवारी बाणेर येथील रुग्णालयात दाखल झाल्यानंतर हा प्रकार उघडकीस आला.

पीडित तरुणी बुधवारी दुपारी हिंजवडी येथील कंपनीतून दुचाकीवरून घरी जात असताना पाऊस आला. त्यामुळे ती चांदे-नांदे रस्त्यावर दुचाकी थांबवून रेनकोट घालत होती. त्यावेळेस टेम्पोतून आलेल्या दोन युवकांनी तिला टेम्पोत टाकले आणि तिच्यावर अत्याचार करण्याचा प्रयत्न केला. मात्र, त्याचवेळी तिथं लोक जात असल्याची चाहूल लागल्यानं ते दोघे घाबरले आणि त्यांनी तिथून पळ काढला. या घटनेनंतर त्या तरुणीनं मोबाइल अॅपवरून मित्रांशी संपर्क साधून घडलेला प्रकार सांगितला. ही तरुणी मूळची तामिळनाडूची असून हिंजवडी आयटी पार्कमधील एका मल्टिनॅशनल कंपनीत काम करते.

वाहतूक कोंडीमुळे आडमार्ग

पीडिता दुपारी चार वाजता कंपनीतून बाहेर पडली. हिंजवडी ते बाणेर या पट्ट्यातील वाहतूक कोंडी टाळण्यासाठी ती हिंजवडी सूस रस्त्यावरून चांदे गावातून जात होती. वाहतूक कोंडी नसती, तर ती सरळ रस्त्याने घरी गेली असती व तिला या प्रकाराला सामोरे जावे लागले नसते, अशी प्रतिक्रिया तिच्या सहकाऱ्यांनी दिली.