म. टा. प्रतिनिधी, पुणे
वातावरणातील अनुकूल घडामोडींमुळे शहरातील आकाश निरभ्र राहणार असून, पुणेकरांना आणखी आठवडाभर आल्दाददायक थंडी अनुभवायला मिळणार आहे. विदर्भ आणि मराठवाड्याच्या काही भागात पुढील दोन दिवस आकाश ढगाळ राहणार आहे, तसेच काही भागात तुरळक पावसाची शक्यता हवामान विभागाने वर्तवली आहे.
बंगालच्या उपसागरामध्ये गेल्या चार दिवसांपासून निर्माण झालेल्या वादळी परिस्थितीचे पडसाद तामिळनाडू, आंध्रप्रदेश, ओडिसामध्ये उमटणार आहेत. पुढील दोन दिवसात या भागात मुसळधार पाऊस तर विदर्भातील चंद्रपूर, नागपूर, गोंदिया, वर्धा,गडचिरोली या भागात तुरळक पाऊस पडणार असल्याचे संकेत हवामान विभागाने दिले आहेत.
दरम्यान, गेल्या दोन दिवसांपासून पश्चिम महाराष्ट्र आणि मराठवाड्यामध्ये ढगाळ वातावरण असून, किमान तापमानात किंचित वाढ झाली आहे. विदर्भात काही भागात रविवारी किमान तापमानात सरासरीच्या तुलनेत लक्षणीय घट नोंदविण्यात आली. कोकण गोव्यात किमान तापमानात वाढ झाली. राज्याच्या उर्वरित भागात किमान तापमान सरासरीच्या जवळपास होते. राज्यातील सर्वांत कमी तापमान १०.२ अंश सेल्सिअस जळगावमध्ये नोंदविण्यात आले. पुण्यामध्ये दिवसभरात १२.५ अंश सेल्सिअस किमान आणि २६.५ अंश सेल्सिअस कमाल तापमान नोंदविण्यात आले. पुढील चार दिवस शहरातील तापमान सरासरीच्या जवळपास राहील, असे हवामान विभागाने सांगितले आहे.