म. टा. प्रतिनिधी, पुणे
आशयघन साहित्याची निर्मिती करणाऱ्या पुण्यातील मनोविकास प्रकाशन संस्थेचा दिल्लीच्या फेडरेशन ऑफ इंडियन पब्लिशर्स या संस्थेने उत्कृष्ट ग्रंथनिर्मितीसाठी गौरव केला आहे. मनोविकास प्रकाशनाला तीन पुस्तकांसाठी 'अॅवॉर्ड फॉर एक्सलन्स इन बुक प्रॉडक्शन' हा पुरस्कार देण्यात आला आहे.
नवी दिल्ली येथील प्रगती मैदान येथे झालेल्या 'दिल्ली बुक फेअर'च्या कार्यक्रमात केंद्रीय माहिती आणि प्रसारण मंत्रालयाचे सचिव अमित खरे यांच्या हस्ते या पुरस्कारांचे वितरण झाले. मनोविकास प्रकाशनचे संचालक आशिष पाटकर यांनी पुरस्कार स्वीकारला. प्रमाणपत्र आणि मानचिन्ह असे या पुरस्काराचे स्वरूप आहे. इंडियन पब्लिशर्सचे अध्यक्ष रमेश मित्तल, उपाध्यक्ष मोनिका कंधारी, राज कुमार, हिमांशू गुप्ता, अनिल गाला यांबरोबरच अशोक गुप्ता, प्रणव गुप्ता, नवीन गुप्ता उपस्थित होते.
मनोविकास प्रकाशनने लहान मुलांसाठी प्रकाशित केलेल्या प्रसाद मणेरीकर लिखित आणि गोपाळ नांदुरकर यांनी रेखाटलेल्या चित्रांच्या 'ससुल्या' या पुस्तकाला द्वितीय पारितोषिकाने सन्मानित करण्यात आले. संदर्भग्रंथांच्या गटात डॉ. रावसाहेब कसबे लिखित 'हिंदू राष्ट्रवाद : स्वा. सावरकरांचा आणि राष्ट्रीय स्वयंसेवक संघाचा' या पुस्तकाला मेरिट सर्टिफिकेट; तसेच मुकुंद धाराशिवकर लिखित 'द्रष्टा अभियंता सर विश्वेशरय्या' या पुस्तकाला विज्ञान आणि तंत्रज्ञान गटात द्वितीय क्रमांकाचे पारितोषिक मिळाले. दोन पुस्तकांची जबाबदारी चित्रकार गिरीश सहस्रबुद्धे यांच्याकडे होती.
भारताला ज्ञानाची महाशक्ती म्हणून घडवायचे असेल, तर तंत्रज्ञानातील बदल, डिजिटल आव्हाने लक्षात घेत प्रकाशकांनी वाटचाल करणे गरजेचे आहे. असे न केल्यास आंतरराष्ट्रीय प्रकाशकांशी आपण स्पर्धा करू शकणार नाही.
- अमित खरे, सचिव, केंद्रीय माहिती आणि प्रसारण मंत्रालय
दिल्लीच्या फेडरेशन ऑफ इंडियन पब्लिशर्स या संस्थेने केंद्रीय माहिती आणि प्रसारण मंत्रालयाचे सचिव अमित खरे यांच्या हस्ते मनोविकास प्रकाशन संस्थेचा उत्कृष्ट ग्रंथनिर्मितीसाठी गौरव केला.