म. टा. प्रतिनिधी, पुणे
'सध्या महिला विमाने चालवितात. लष्करातही आहेत. मात्र, मोठी बस चालवणे सोपी गोष्ट नाही. एसटीच्या ताफ्यात दाखल झालेल्या महिला चालकांचे धाडस कौतुकाचे आहे. महिलांना संधी मिळाली, तर नक्कीचे संधीचे सोने करू शकतात, हेच त्यांनी दाखवून दिले आहे. या उपक्रमाद्वारे आपण देशाला आदर्श घालून देत आहोत,' असे प्रतिपादन माजी राष्ट्रपती प्रतिभाताई पाटील यांनी शुक्रवारी केले.
राज्य मार्ग परिवहन महामंडळाने (एसटी) बसचालकपदी १६३ महिलांची निवड केली आहे. त्यांच्या प्रशिक्षणाचा प्रारंभ पाटील यांच्या हस्ते झाला. या वेळी विधान परिषदेच्या उपसभापती डॉ. नीलम गोऱ्हे, परिवहन मंत्री व एसटी महामंडळाचे उपाध्यक्ष दिवाकर रावते, आमदार माधुरी मिसाळ, एसटी महामंडळाचे व्यवस्थापकीय संचालक रणजितसिंह देओल, माधव काळे, केंद्रीय रस्ते वाहतूक संस्थेचे संचालक कॅप्टन राजेंद्र सनेर-पाटील आदी या वेळी उपस्थित होते.
'महिला चालकांचा एसटीचा प्रवास इतरांसाठी प्रेरणादायी असणार आहे. महिला विविध क्षेत्रांत आपले कर्तृत्व सिद्ध करीत आहेत. मी १९६२ मध्ये आमदार असताना एसटी जवळून पाहिली आहे. त्यामुळे एसटीविषयी मनात आपुलकी आहे. एसटी चालकपदी आदिवासी महिलांची निवड करून, त्यांना स्वावलंबी बनविण्याचा हा प्रयत्न आहे,' असे पाटील या वेळी म्हणाल्या. महिलांना त्यांच्या मूळ नियुक्तीच्या ठिकाणापासून दूरचा मार्ग देऊ नये. धोकादायक मार्गांवर त्यांना पाठवू नये. मुक्कामाची चांगली आणि सुरक्षित व्यवस्था असेल, अशाच ठिकाणी त्यांना मुक्कामी पाठवा, अशा सूचनाही पाटील यांनी या वेळी केल्या. 'महिलांमध्ये जन्मत:च मातृत्वाची भावना असते. त्यामुळे सर्व महिलाचालक मातृत्वाच्या भावनेने बस चालवतील. त्यातून एक आदर्श निर्माण करतील. मातृत्व, ममत्व आणि कर्तृत्व यातून या महिला उद्याचा आदर्श ठरतील,' असे रावते म्हणाले. 'महिलांना कोणी मुद्दाम त्रास देत असेल, तर महिलांना पिस्तूल बाळगण्याची परवानगी द्यावी. त्यांच्याकडे हत्यार असल्याच्या कल्पनेनेच त्यांचा निम्मा त्रास कमी होईल,' असे डॉ. गोऱ्हे म्हणाल्या. दरम्यान, सांगली, कोल्हापूर येथे पूरग्रस्तांना मदत करणाऱ्या अधिकारी-कर्मचाऱ्यांचा या वेळी सत्कार करण्यात आला.
..........
\Bनिवृत्त कर्मचाऱ्यांनी ६५ वर्षांपर्यंत एसटी मोफत
\Bएसटीच्या निवृत्त कर्मचाऱ्यांना मोफत पास देण्याची योजना सुरू करण्यात आली आहे. कर्मचारी सेवेत असताना, त्यांना कुटुंबाला फारसा वेळ देणे शक्य होत नाही. त्यामुळे निवृत्तीनंतर संबंधित कर्मचारी आणि त्यांची पत्नी किंवा पती यांना ६५ वर्षे वयापर्यंत एसटीचा मोफत पास दिला जाणार आहे, असे रावते यांनी स्पष्ट केले.
..........
\Bराज यांची 'ईडी' चौकशी निरर्थक\B
'लोकशाहीत कोणाला नाहक त्रास होत असल्यास त्यांच्या पाठिशी उभे राहण्यात चुकीचे काही नाही. शिवसेना पक्षप्रमुख उद्धव ठाकरे यांनी राज ठाकरे यांच्या 'ईडी' चौकशीबाबत यापूर्वीच स्पष्ट केले आहे. राज यांची चौकशी निरर्थक आहे. त्यातून काही निघणार नाही,' असे दिवाकर रावते यांनी या वेळी सांगितले.
..........
देशाची पहिली महिला राष्ट्रपती या बिरुदावलीपेक्षा देशातील पहिली महिला एसटी बसचालक, ही बिरुदावली खूप महत्त्वाची वाटते.
- प्रतिभाताई पाटील (माजी राष्ट्रपती)
...........