अनधिकृत बस वाहतूक सुरूच

शहरात निर्बंध असतानाही खासगी बसचे वाढले प्रस्थ

म. टा. प्रतिनिधी, पुणे
खासगी प्रवासी वाहतुकीवर शहरी भागामध्ये निर्बंध असताना, विविध ठिकाणी सर्रासपणे बस उभ्या करून प्रवाशांची वाहतूक सुरू असल्याचे चित्र पाहायला मिळत आहे. अनेक भागांमध्ये विशेषतः सायंकाळनंतर खासगी बसचे अनधिकृत थांबेच तयार झालेले आहेत. यामुळे वाहतुकीला अडचण निर्माण होत आहे. तसेच, बेदरकारपणे चालविल्या जाणाऱ्या बसमुळे सुरक्षिततेचा प्रश्नही निर्माण होत असून, वाहतूक पोलिसांचे याकडे दुर्लक्ष होत आहे.

शहरात खासगी प्रवासी वाहतूक करणाऱ्या बसला विशिष्ट थांबा देण्यात आलेला नाही. सध्या संगमवाडी रस्त्यावर खासगी जागेमध्ये या बसचा थांबा आहे. तेथूनच प्रवासी वाहतूक केली जाते. मात्र, आता सुट्यांचा कालावधी सुरू झाल्याने बाहेरगावी जाणाऱ्या प्रवाशांची संख्या वाढली आहे. त्यामुळे मागणीतही वाढ झाली आहे. परिणामी, शहराच्या विविध भागांमध्ये या बस थांबवून प्रवासी वाहतूक केली जाते. स्वारगेट, शिवाजीनगर, पुणे स्टेशन, बाणेर, बावधन, चांदणी चौक, वाकड, कात्रज, नगर रस्ता आदी ठिकाणी या बस उभ्या केल्या जात आहेत.

शहरातील काही रस्त्यांवर, तसेच मध्यवर्ती भागामध्ये एसटी बस वगळता अवजड वाहने व मल्टीअॅक्सल वाहनांना प्रवेश बंदी आहे. टिळक रस्त्यावर एसटी महामंडळाच्या बसला देखील परवानगी नाही. वाहतूक पोलिसांनी यासंबंधीची अधिसूचना काढली होती. मात्र, हा नियम देखील धाब्यावर बसविण्यात येत असल्याचे दिसून येते.

एसटी स्टँडमध्ये ‘एजंट’

राज्य मार्ग परिवहन महामंडळाच्या (एसटी) स्टँडपासून दोनशे मीटर अंतराच्या परिसरात खासगी वाहतूकदारांना बस उभ्या करून व्यवसाय करण्यास मनाई आहे. मात्र, स्वारगेट आणि शिवाजीनगर एसटी स्टँडच्या परिसरात सर्रासपणे रात्रीच्या वेळेला अस्ताव्यस्त उभ्या करून प्रवासी वाहतूक केली जाते. त्यांचे ‘एजंट’ही स्टँडच्या आवारात प्रवेश करून प्रवासी मिळवित आहेत. या बस चालकांच्या विरोधात कारवाई करण्याबाबत एसटी प्रशासन, वाहतूक पोलिस आणि प्रादेशिक परिवहन कार्यालयाकडून डोळेझाक केली जात आहे.