म. टा. प्रतिनिधी, पुणे
व्यावसायिक आणि घरगुती गॅस हा सिलिंडरमधून काढून तो बेकायदा पद्धतीने छोट्या टाक्यांमध्ये भरून त्याची विक्री केली जात असल्याचे समोर आले आहे. या प्रकरणी हडपसर पोलिसांनी एका व्यक्तीला अटक केली आहे. त्याच्याकडून पोलिसांनी ७६ हजार रुपयांचा मुद्देमालदेखील जप्त केला आहे.
प्रदीप गुंडु धुमाळे (वय ३२, रा. कुमार सोसायटी, फुरसुंगी) असे अटक करण्यात आलेल्या आरोपीचे नाव आहे. त्याच्याविरुद्ध जीवनावश्यक वस्तू अधिनियमाद्वारे गुन्हा दाखल करण्यात आला आहे. पोलिस हवालदार एस. के. जोशी यांनी या प्रकरणी तक्रार दिली आहे. सोमवारी रात्री साडेदहा वाजण्याच्या सुमारास फुरसुंगी येथील देशमुख मळा येथील नवीन कालव्याजवळ एक व्यक्ती व्यावसायिक व घरगुती कारणांसाठी वापरला जाणारा गॅस काढून तो छोट्या टाक्यांमध्ये भरत असल्याची माहिती पोलिसांना मिळाली. त्यानुसार, पोलिसांनी घटनास्थळी छापा घातला. त्या वेळी एचपी कंपनीचे १९ किलो वजनाचे २६ मोकळे सिलिंडर, चार किलोच्या २६ मोकळ्या टाक्या यांसह रिलॅक्स कंपनीचे १५ किलो वजनाच्या नऊ मोकळ्या टाक्या, एक फिलर व एक इलेक्ट्रॉनिक वजनकाटा असा ७६ हजार रुपये किंमतीचा मुद्देमाल पोलिसांनी जप्त केला. धुमाळे हा बेकायदा पद्धतीने गॅस सिलिंडरमधून काढून तो दुसऱ्या टाकीमध्ये भरत असल्याचे लक्षात आल्यानंतर पोलिसांनी त्याच्यावर गुन्हा दाखल करून अटक केली, अशी माहिती पोलिसांनी दिली.
००००००