म. टा. प्रतिनिधी, पुणे
ग्रामीण संस्कृतीचे नयनरम्य दर्शन, समुद्र सौंदर्याच्या विविध छटा, मानवी चेहऱ्याचे विविध भाव टिपणारी व्यक्तिचित्रे, इतिहासाची साक्ष देणारी वास्तुचित्रे, निसर्गाच्या विविध रंगांची उधळण करणारी निसर्ग चित्रे आणि व्यायामाचे महत्त्व सांगणाऱ्या मोहक शिल्पाकृती... अशा चित्र आणि शिल्पांच्या मनोहारी कलाकृती एकाच कलादालनात पाहण्याची संधी पुणेकरांसाठी उपलब्ध झाली आहे.
यशवंतराव चव्हाण कलादालनात नवोदित कलाकारांना हक्काचे व्यासपीठ मिळावे, यासाठी रंगसमर्थ या भव्य राज्यस्तरीय चित्र प्रदर्शनाचे आयोजन करण्यात आले असून गुरुवारी प्रदर्शनाचे उद्घाटन कोल्हापूर येथील विशेष मुलांची संस्था असलेल्या स्वयंम संस्थेच्या मुख्याध्यापिका शोभा तावरे यांच्या हस्ते करण्यात आले. अतुल काटकर, गणेश केंजळे, प्रमोद माने, प्रविण पांडरकर आदी या वेळी उपस्थित होते. रंगसमर्थचे हे तिसरे प्रदर्शन असून, प्रदर्शनात एकूण १०७ चित्रे मांडण्यात आली आहेत.
प्रदर्शनात जलरंग, तैलरंग, शिल्पकला, अॅक्रेलिक, चारकोल, पेन्सिल स्केच अशा विविध माध्यमातून काढलेली विविध प्रकारची चित्रे पुणेकर रसिकांना अनुभवता येणार आहेत. छत्रपती शिवाजी महाराज, कोल्हापूरची महालक्ष्मी देवी, छत्रपती शाहू महाराज, पंतप्रधान नरेंद्र मोदी ही पेन्सिल स्केच व चारकोलच्या माध्यामातून साकरालेली चित्रे, तर चर्चगेट रेल्वे स्टेशन, सुवर्ण मंदिर, ऐतिहासिक वाडे अशी जलरंगांच्या माध्यमातून साकारलेल्या वास्तूचित्रांचा यामध्ये समावेश आहे. कोकणातील हिरवीगार झाडी, निळाशार समुद्र, सायंकाळचा समुद्र किनारा, अशी निसर्गाचे दर्शन घडविणारी निसर्गचित्रे प्रदर्शनात मांडण्यात आली आहेत.
एम.सील.चा वापर करून साकारलेली शिल्पे, हे या प्रदर्शनाचे वैशिष्टय आहे. प्रदर्शनात गोवा, कर्नाटक, मध्य प्रदेश, ओडिसा, दिल्ली, गुजरात या राज्यांसह २५ विविध शहरातील कलाकारांनी सहभाग घेतला आहे. ८ वर्षापासून ते ८० वर्षांच्या वयोगटापर्यंतच्या कलाकारांची चित्रे प्रदर्शनात आहेत. हे प्रदर्शन रविवार, दि. २ जून पर्यंत सकाळी १० ते रात्री ८ या वेळेत विनामूल्य खुले राहणार आहे.