म. टा. प्रतिनिधी, पिंपरी
पोल्ट्री बर्ड्स व्यवसायाची रोकड चोरणाऱ्या डिलेव्हरी बॉयला वाकड पोलिसांनी अवघ्या चार तासांत अटक केली. या प्रकरणी गुरुवारी (१४ सप्टेंबर) वाकड पोलिस ठाण्यात गुन्हा दाखल करण्यात आला होता. त्यानंतर पोलिसांनी अवघ्या चार तासांत आरोपीला बेड्या ठोकल्या.
साकीरआलम जेहरूल हक (वय २१, रा. ताथवडे. मूळ रा. बिहार) असे अटक केलेल्याचे नाव आहे. या प्रकरणी आरफात अस्लम शेख (२०, रा. सोनवणे वस्ती जवळ, ताथवडे) यांनी वाकड पोलिस ठाण्यात फिर्याद दिली. वरिष्ठ निरीक्षक सतीश माने यांनी दिलेल्या माहितीनुसार, शेख मोमीन ट्रेडर्स ताथवडे येथे कॅशियर म्हणून नोकरी करीत आहेत. तर हक हा तिथेच डिलेव्हरी बॉय म्हणून काम करतो. पोल्ट्री बर्ड्स व्यवसायाची ७० हजार रुपयांची रोकड सुरक्षेच्या कारणास्तव शेख हे डोक्याखाली घेऊन झोपले होते. हक याने संधी साधून पैसे ठेवलेली बॅग घेऊन पोबारा केला. झोपेतून जाग आल्यानंतर शेख यांच्या ही बाब लक्षात आली. त्यांनी वाकड पोलिस ठाण्यात धाव घेतली.
वाकड पोलिस ठाण्याचे तपास पथकाला हक हा चेंबूर, मुंबई येथे असल्याची माहिती मिळाली. पोलिसांनी सापळा रचून त्याला ताब्यात घेतले. त्याने चोरीची कबुली दिल्याचे पोलिसांनी सांगितले. त्याच्याकडून ६८ हजार ४०० रुपये हस्तगत करण्यात आले आहेत. फौजदार हरीश माने, कर्मचारी शाम बाबा, बापूसाहेब धुमाळ, बिभीषण कन्हेरकर, प्रमोद कदम, मोहम्मदगौस नदाफ, अशोक दुधवणे, सुरेश भोसले, धनराज किरनाळे, दादा पवार, रमेश गायकवाड, विजय गंभीरे, विक्रम कुदळ, राजेश बारशिंगे, नितीन गेंजगे, मधुकर चव्हाण, विक्रांत गायकवाड यांच्या पथकाने ही कामगिरी केली.
------