म. टा. प्रतिनिधी, पिंपरी
पिंपरी जयहिंद शाळच्या शेजारी बार, तपोवन मंदिर समोर बिअर शॉपी, पंडित जवाहरलाल नेहरूनगर येथे त्यांच्या पुतळ्याजवळील वॉइन शॉप, अजमेरा कॉलनी येथील देवीच्या मंदिरासमोर वॉइनशॉप, पिंपरी साई चौकातील समाजमंदिराजवळ दारूविक्री, संततुकारामनगर येथे वायसीएम हॉस्पिटलच्या रस्त्यावर समाजमंदिरासमोर बार, संततुकारामनगर पोलिस चौकी शेजारी परमिट रूम, टेल्को रस्त्यावरील कमलनयन बजाज शाळेसमोरील चार मद्यालय यासह चिंचवड, पिंपळेगुरव असो वा सांगवी वाकड अनेक ठिकाणी सर्रास नियम धाब्यावर बसवून दारू विक्री केली जात आहे.
शाळा-महाविद्यालये आणि प्रार्थनास्थळांच्या परिसरात नियम धाब्यावर बसवून पुणे शहरात सर्रास मद्यविक्री होत असल्याचे ‘महाराष्ट्र टाइम्स’ने केलेल्या पाहणीत उघड झाले. याच प्रमाणे पिंपरी-चिंचवड शहरात पाहणी केल्यावर येथे देखील अशाच प्रकारे सर्रास मद्यविक्री होत असल्याचे दिसून आले. औंधरोड गणपती मंदिरासमोरील वाइन शॉप व परमीट रूम, खडकी डॉ. आंबेडकर रस्त्यावरील समाज मंदिरासमोरील देशी-विदेशी दारूदुकान व बार, दापोडी येथे समाज मंदिराजवळ मद्यालय, आकुर्डी म्हाळसाकांत कॉलेज जवळ दारूदुकान थाटण्यात आली आहेत.
सुप्रीम कोर्टाच्या दणक्यानंतर राष्ट्रीय आणि राज्य महामार्गावरील दारूविक्री बंद झाली. परंतु, शहरातील अंतर्गत भागात नियमांची पायमल्ली करीत अनेकांनी दारूचा महापूर वाहण्यास हातभार लावल्याचे दिसून येते. पिंपरी कॅम्प परिसरात अनेकांची दुकान ही लीजवर आहेत. अनेकांकडे बांधकाम पुर्णत्वःचा दाखला नाही. भरवस्ती आणि बाजारपेठेत दारू विक्री केली जात आहे. आर्यसमाज शाळेच्या चौकात दारू विक्रीची दोन दुकान आहेत. चिंचवड लिंक रस्ता असो वा जगताप डेअरी चौक ते कोकणे चौक असो अनेक बार हे विविध पळवाटांचा आधार घेऊन सुरू करण्यात आले आहेत. हायवेवरील दारू विक्री बंद करण्याचे आदेश असताना देखील काहींनी हॉटेलला वळसा घालून ५०० मीटरचे अंतर कमी करण्याची शक्कल लढविली आहे.
महाविद्यालयांच्या इमारतींपासून हाकेच्या अंतरावर असलेल्या बार-वाईन शॉपमुळे विद्यार्थ्यांची दिवसाढवळ्या देखील येथे गर्दी होताना दिसते. संततुकारामनगर भागात डी.वाय. पाटील कॉलजचे दोन मोठे कॅम्पस आहेत. देशविदेशातून याठिकाणी विद्यार्थी शिकण्यासाठी येतात. पण या दोन्ही कॅम्पसच्या आसपास चार ते पाच दारू विक्रीची दुकान सुरू आहेत. शाळा महाविद्यालय, समाज मंदिरापासून किमान ७५ मीटरच्या आत दारू विक्री होऊ नये असा नियम आहे. पण त्याची पळवाट म्हणून काहींनी हॉटेलचे प्रवेशव्दार दुसऱ्या बाजूला दाखवून मद्यविक्री सुरू ठेवली आहे. शहरातील बहुतांष ठिकाणी हीच परिस्थिती असून, राज्य उत्पादन शुल्कविभाग आणि शासनाकडून याकडे काणाडोळा केला जात आहे.
आधी बार की आधी शाळा...
शहरातील बहुतांष ठिकाणी शाळा, महाविद्यालय, समाजमंदिराजवळ दारू विक्री होत आहे. याबाबत अधिकाऱ्यांकडे चौकशी केली असता आधी बार की आधी शाळा हे देखील पाहिले जाते. जर बार किंवा दारू विक्री दुकान आधी सुरू झाले असेल आणि त्यानंतर शाळा सुरू झाली असल्यास दारू दुकानावर कारवाई केली जात नसल्याचे सांगितले जात आहे. यावरून कायदे तेवढ्या पळवाटा ही उक्ती स्पष्ट होत आहे.
फोटो पाठवा
शाळा-महाविद्यालये किंवा प्रार्थना स्थळांपासून मद्य विक्रीची दुकाने किंवा बिअर बार ७५ मीटरच्या आत असल्याचे तुम्हांलाही आढळून आल्यास त्याची छायाचित्रे ‘सिटीझन रिपोर्टर’च्या माध्यमातून पाठवा. अशा छायाचित्रांना प्रसिद्धी देण्यात येणार असून, छायाचित्र पाठविणाऱ्यांचे नाव गुप्त ठेवण्यात येईल.