म. टा. प्रतिनिधी, पुणे
सावित्रीबाई फुले पुणे विद्यापीठाने जून महिन्यात केलेल्या १६ हजार ६६१ कडुलिंब रोपांच्या वितरण उपक्रमाची नोंद 'गिनेस बुक ऑफ वर्ल्ड रेकॉर्ड'मध्ये झाली आहे. विद्यापीठाच्या 'स्वच्छ वारी, स्वस्थ वारी,' 'निर्मळ वारी, हरित वारी' या अभियानाअंतर्गत विद्यापीठाच्या मैदानावर गेल्या २३ जून रोजी एकाच प्रकारची सर्वाधिक रोपे वाटण्याचा जागतिक विक्रम करण्यात आला.
विद्यापीठाच्या राष्ट्रीय सेवा योजनेतर्फे २३ जून रोजी मुख्यमंत्री देवेंद्र फडणवीस यांच्या प्रमुख उपस्थितीत १६ हजार ६६१ विद्यार्थ्यांना कडुलिंबाची सर्वाधिक रोपे वाटण्याचा जागतिक विक्रम केला. त्याची नोंद आता 'गिनेस बुक ऑफ वर्ल्ड रेकॉर्ड्स'मध्ये अधिकृतरीत्या करण्यात आली आहे. त्यात राष्ट्रीय सेवा योजनेचे विद्यार्थी सहभागी झाले होते. उपस्थित विद्यार्थ्यांना मुख्यमंत्र्यांनी स्वच्छता, स्वास्थ्य, शौचालयाचा वापर करण्याबाबतचे प्रबोधन आणि हरित क्रांती घडवून आणण्याबाबत शपथ दिली होती. याबाबत व्यवस्थापन परिषदेचे सदस्य राजेश पांडे यांनी सांगितले की, असा विक्रम करणारे हे देशातील पहिलेच विद्यापीठ आहे. हे सर्वांनी केलेल्या प्रयत्नांचेच फळ आहे. या विक्रमामुळे राष्ट्रीय सेवा योजनेचे नाव आंतरराष्ट्रीय स्तरावर गेले आहे. या विक्रमाचे छायाचित्र व माहिती https://guinnessworldrecords.com/world-records/95447-largest-distribution-of-saplings या लिंकवर प्रसिद्ध करण्यात आली आहे.
......
रोपांची लागवड झाली का?
'रोपे वितरणानंतर ती लावण्यात आली नाही. विद्यापीठाच्या परिसरात ती पडून आहेत,' अशी तक्रार विद्यार्थी संघटनांकडून करण्यात येत आहे. वितरणातील अनेक रोपे विद्यापीठाच्या आवारात पडून असल्याचा आरोपही करण्यात आला. मात्र, वितरण केलेल्या रोपांपैकी बहुतांश रोपे लावण्यात आलेली आहेत, काही रोपांची लागवड झाली नसू शकते, असे विद्यापीठ प्रशासनाने सांगितले.
..........
विक्रम कशाचा?
एकाच ठिकाणी एकाच प्रकारची १६,६६१ रोपे वाटण्यात आली. त्याची नोंद 'गिनेस बुक ऑफ वर्ल्ड रेकॉर्ड्स'मध्ये केली जाणार आहे. याआधी दुबईतील एका शाळेने एकाच प्रकारच्या ९४७१ रोपांचे वाटप करून विक्रम केला होता. तो मोडण्यात आला. या विक्रमाचे अर्जदार कुलगुरू डॉ. नितीन करमळकर आहेत. ही रोपे जगवण्याची व वाढवण्याची जबाबदारी वारीच्या मार्गावरील महाविद्यालयांकडे देण्यात आली आहे.
........
विद्यापीठातर्फे राबविण्यात येणाऱ्या समाजाभिमुख उपक्रमांना आंतरराष्ट्रीय पातळीवर मिळालेली ही दाद आहे. आम्ही विक्रम व्हावा किंवा नाव व्हावे, या हेतूने असे कार्यक्रम राबवत नाही. तरीही त्यातून विक्रम घडतो तेव्हा आनंद होतो. याद्वारे पर्यावरणाच्या जतनाचे महत्त्व कळण्यास निश्चित मदत होईल. या उपक्रमात सक्रियपणे सहभागी झालेले विद्यार्थी आणि विद्यापाठीतील सर्व घटकांचे सर्वांचे मी अभिनंदन करतो.
- डॉ. नितीन करमळकर, कुलगुरू, सावित्रीबाई फुले पुणे विद्यापीठ