म. टा. प्रतिनिधी, पुणे
पाणीप्रश्न अधिकाधिक लोकांपर्यंत पोहोचविण्यासाठी 'जलसंवाद रेडिओ' हा पाण्यावर चालणारा रेडिओ ज्येष्ठ संशोधक दत्ता देशकर यांनी सुरु केला आहे. या जलसंवाद रेडिओचे अनौपचारिक उद्घाटन शुक्रवारी पत्रकार भवन येथे झाले. पुण्यातील हॅम रेडिओ चालक विलास रबडे, एफटीआयआय येथील कम्युनिटी रेडिओचे संजय चांदेकर, श्रीपाद कुलकर्णी, वीणा देशकर, अजय देशकर यावेळी उपस्थित होते.
औरंगाबाद येथील डॉ. बाबासाहेब आंबेडकर महाविद्यालयातील निवृत्त प्राचार्य डॉ. देशकर यांनी गेल्या १७ वर्षांपासून जलसाक्षरतेच्या कामात वाहून घेतले आहे. 'मराठवाड्यातील बदलते पर्जन्यमान व त्याचा शेतकऱ्यांच्या जीवनावर होणारा परिणाम' हा विषय निवडून त्यांनी मराठवाडा विद्यापीठाची पीएचडी मिळवली आहे. अधिकाधिक लोकांपर्यंत पोहोचून पाण्याविषयी बोलावे, या उद्देशाने पाणी विषयावर जलसंवाद वेब रेडियो सुरु करण्याचा निर्णय घेतल्याचे देशकर यांनी सांगितले. हा रेडियो मोबाइलवर अथवा संगणकावर सहजपणे ऐकू येवू शकतो. ही रेडियो सेवा निःशुल्क आहे. हा रेडियो जगात कोठेही ऐकला जाऊ शकतो. जलसंवाद रेडियो हे एक अॅप डाउनलोड केल्यास आपणही या रोडियोचा लाभ घेवू शकतो, असे त्यांनी सांगितले.
पाण्यावरील नामवंत व्यक्तींची भाषणे, पाण्यावरील चर्चा, मुलाखती, जलक्षेत्रातील यशोगाथा, जलक्षेत्रात कार्य करणाऱ्या व्यक्ती आणि संस्थांचा परिचय, पाण्यावरील बातम्या, पाण्यावरील नाटके, गाणी, कीर्तने, देशातील व परदेशातील नद्या, धरणे, सरोवरे यांचा परिचय, विविध देशातील पाणी प्रश्न, हवामानाचे अंदाज, जलविज्ञानाबद्दल माहिती, गृहिणींसाठी पाणी वापराबद्दल छोट्याछोट्या टिप्स या माध्यमातून रेडियोद्वारे जलप्रबोधन होणार आहे. यामध्ये श्रोत्यांनाही सहभागी होता येणार असून, आपले पाण्यावरील विचार ऑडियो क्लिपद्वारे अथवा मेलद्वारे पाठवता येणार असल्याचे त्यांनी सांगितले.
००००