म. टा. प्रतिनिधी, पुणे
नृत्य आणि संगीत यांचा सुंदर मिलाफ असणाऱ्या शनिवारवाडा नृत्य आणि संगीत महोत्सवाचे शानदार उद्घाटन रविवारी सायंकाळी प्रख्यात अभिनेत्री पद्मिनी कोल्हापुरे यांच्या हस्ते शनिवारवाड्याच्या प्रांगणात झाले. या वेळी सादर झालेल्या विविध प्रकारच्या चित्तवेधक नृत्यरचनांनी उपस्थितांना खिळवून ठेवले होते.
महोत्सवाचे यंदाचे १८ वे वर्ष आहे. संयोजन समितीतर्फे अभिनेते जॅकी श्रॉफ, नृत्यगुरू मनीषा साठे आदी उपस्थित होते. या वेळी बोलताना कोल्हापुरे म्हणाल्या की, शनिवारवाडा महोत्सवाला उपस्थित राहता आले, याचा आपल्याला मनस्वी आनंद आहे.
महोत्सवाचे उद्घाटन झाल्यानंतर ज्येष्ठ भरतनाट्यम् नृत्यांगना डॉ. स्वाती दैठणकर व त्यांच्या 'नुपूरनाद' संस्थेच्या शिष्यांनी गणेशवंदना सादर केली. याचे संगीत डॉ. धनंजय दैठणकर यांचे होते; तर गायन पं. रघुनंदन पणशीकर यांनी केले होते. त्यानंतर 'महाभारत रीइंटरप्रीटेड - अतित की परछाईयाँ' या नृत्य व संगीत यांचा सुंदर मिलाफ असणाऱ्या १०५ मिनिटांच्या नृत्यसंरचनेने प्रेक्षकांना तृप्त केले. याची संकल्पना व नृत्य दिग्दर्शन नृत्यगुरू पं. शमा भाटे यांचे होते. सर्वच नृत्यांच्या सादरीकरणास प्रेक्षकांनी उत्स्फूर्त प्रतिसाद दिला.
.....