आर्थिक घोटाळ्याच्या धमकीने खंडणी; व्यावसायिकाकडून उकळले सहा लाख रुपये

पुणे : तुम्ही मोठा आर्थिक घोटाळा केला असून, अनेक लोकांची आर्थिक फसवणूक केली आहे. तुमच्या विरुद्ध फसवणुकीचा गुन्हा दाखल केल्यास व्यवसायाचे नुकसान होईल, अशी भीती दाखवून गुंडाने व्यावसायिकाकडून सहा लाख रुपयांची खंडणी उकळल्याचा प्रकार उघडकीस आला आहे. या प्रकरणी मुख्य आरोपीसह पाच जणांना अटक करण्यात आली.

असीफखान इस्माईलखान पठाण (रा. कोणार्कपुरम, कोंढवा, मूळ रा. औरंगाबाद) असे अटक करण्यात आलेल्या मुख्य आरोपीचे नाव आहे. त्याचे साथीदार समीर मेहबूब शेख (वय ३६), शहाबाज मेहमूद खान (५०) आणि फरियाज हसनखान पठाण (३९, तिघे रा. संतोषनगर, कात्रज); तसेच इरफान हसन भोला (२५, रा. पर्वती पायथा) यांना अटक करण्यात आली आहे.

तक्रारदार यांचा व्यवसाय आहे. आरोपी असीफखान पठाण याने व्यावसायिकाला आर्थिक घोटाळ्याची भीती दाखवली. लोकांच्या आर्थिक फसवणुकीबाबत तुमच्याविरुद्ध फसवणुकीचा गुन्हा दाखल केल्यास व्यवसायाचे नुकसान होईल, अशी भीती दाखवून त्यांना शिवीगाळ केली. तुमच्याविरोधात पोलिसांकडे तक्रार दिल्यास तुमची प्रतिष्ठा धोक्यात येईल, असे धमकावून त्याने व्यावसायिकाकडे खंडणीची मागणी केली. तक्रारदारावर बंदूक उगारून त्याने सहा लाख रुपये उकळले. त्यानंतरही आरोपी पठाण व्यावसायिकाला त्रास देत होता. याबाबत चंदननगर पोलिस ठाण्यात गुन्हा दाखल झाल्यानंतर आरोपी पठाण साथीदारांसह फरारी झाला. त्याचा शोध घेण्यासाठी चंदननगर पोलिसांनी पथके नेमली. आरोपी पठाणचा शोध घेताना तो बीड, जालना, औरंगाबाद या शहरांच्या परिसरात रोज जागा बदलून राहत असल्याची माहिती पोलिसांना मिळाली.

वरिष्ठ पोलिस निरीक्षक राजेंद्र लांडगे आणि पोलिस निरीक्षक (गुन्हे) जगन्नाथ जानकर यांच्या मार्गदर्शनाखाली उपनिरीक्षक अरविंद कुमरे, अंमलदार संकपाळ नाणेकर, शेखर शिंदे, श्रीकांत कोद्रे, सूरज जाधव, सुभाष आव्हाड, गणेश हांडगर, विकास कदम, नामदेव गडदरे यांनी ही कामगिरी केली.

सापळा लावून केली अटक

औरंगाबाद येथे सापळा लावून त्याला अटक करण्यात आली. पठाण याचे साथीदार शेख, खान आणि पठाण यांना; तसेच खंडणीची रक्कम ताब्यात घेतलेल्या भोला याला पर्वती पायथा येथून अटक करण्यात आली. असीफखान पठाण याच्या विरोधात औरंगाबाद आणि पुण्यात खंडणी व चोरीचे चार गुन्हे दाखल आहेत.