म. टा. प्रतिनिधी, पुणे
महाराष्ट्र राज्य माध्यमिक आणि उच्च माध्यमिक शिक्षण मंडळाच्या दहावी उत्तीर्ण विद्यार्थ्यांना नामांकित कनिष्ठ महाविद्यालयात इयत्ता अकरावीला प्रवेश मिळावा, यासाठी पुणे व पिंपरी चिंचवड परिसरातील एकूण १९ महाविद्यालयांमध्ये १ हजार ४०६ जागा राज्य सरकारकडून वाढविण्यात आल्या आहेत. या महाविद्यालयांमध्ये फर्ग्युसन, एसपी, आबासाहेब गरवारे, मॉडर्न, नौरोसजी वाडिया, नेस वाडिया, सिटी प्राइड अशी महाविद्यालये असल्याने राज्य मंडळाच्या विद्यार्थ्यांना प्रवेशात दिलासा मिळण्याची शक्यता आहे.
दहावीच्या घटलेल्या निकालाच्या पार्श्वभूमीवर अकरावी प्रवेशासाठी राज्य मंडळाच्या विद्यार्थ्यांवर नामांकित महाविद्यालयांमधील प्रवेशासाठी संघर्ष करण्याची वेळ येणार होती. त्यामुळे ज्या महाविद्यालयांचा कटऑफ गेल्या वर्षी दुसऱ्या फेरीत ८५ टक्क्यांहून अधिक होता, अशा महाविद्यालयांत सायन्स, कॉमर्स, आर्ट्समध्ये १० टक्के जागा वाढविण्याचा निर्णय घेण्यात आला आहे. निर्णय घेऊन १० दिवसांचा कालावधी उलटून गेल्यावरही शहरातील कोणत्या नामांकित महाविद्यालयात किती जागा वाढणार, याबाबतची माहिती शिक्षण उपसंचालक कार्यालयाकडून जाहीर करण्यात आलेली नाही. त्यामुळे विद्यार्थी आणि पालक संभ्रमात असून, नामांकित महाविद्यालयांमधील जागावाढ गुलदस्त्यात होती.
मात्र, बुधवारी पुणे व पिंपरी-चिंचवड परिसरातील १० टक्क्याच्या निर्णयानुसार एकूण १९ महाविद्यालयांमध्ये सायन्स, कॉमर्स, आर्ट्स विद्याशाखांमध्ये १ हजार ४०६ जागा वाढविण्यात आल्या आहेत. पुणे आणि पिंपरी-चिंचवड परिसरातील कनिष्ठ महाविद्यालयात राबवण्यात येत असलेल्या अकरावी ऑनलाइन प्रवेश प्रक्रियेसाठी विद्यार्थ्यांकडून अर्जाचा 'भाग एक' आणि 'भाग दोन' भरण्यात येत आहे. प्रवेशाच्या 'भाग दोन'मध्ये विद्यार्थ्यांना महाविद्यालयांचे प्राधान्यक्रम भरायचे असतात. अशा वेळी विद्यार्थ्यांना मिळालेले गुण आणि महाविद्यालयांमधील रिक्त जागा आणि गेल्या वर्षीचा कटऑफ याचा विचार करून विद्यार्थी प्राधान्यक्रम भरतात. यंदा सीबीएसई आणि आयसीएसईच्या विद्यार्थ्यांपेक्षा राज्य मंडळाच्या विद्यार्थ्यांना गुण कमी मिळाल्यामुळे जागा वाढविण्याचा निर्णय घेण्यात आला आहे.
या प्रवेश प्रक्रियेत आतापर्यंत ८३ हजार १८ विद्यार्थ्यांनी अर्जाची नोंदणी केली आहे. गेल्या वर्षी जवळपास ९६ हजार जागा प्रवेशांसाठी उपलब्ध होत्या, तर यंदा ९२ हजार ३५० जागा उपलब्ध आहेत. यंदा प्रवेश प्रक्रियेत १० महाविद्याालयांची भर पडल्याने प्रवेश क्षमता वाढण्याची अपेक्षा होती. प्रत्यक्षात घट झाली आहे.
१० टक्के जागावाढ झालेली महाविद्यालये
- आबासाहेब गरवारे महाविद्यालय
- सिटी प्राइड कॉलेज
- डॉ. कलमाडी शामराव कनिष्ठ महाविद्यालय
- फर्ग्युसन महाविद्यालय
- जय हिंद कनिष्ठ महाविद्यालय
- कमल नयन बजाज कनिष्ठ महाविद्यालय
- एमएमसीसी कनिष्ठ महाविद्यालय
- गरवारे कॉलेज ऑफ कॉमर्स
- मॉडर्न कनिष्ठ महाविद्यालय
- नेस वाडिया कॉलेज ऑफ कॉमर्स
- नौरोसजी वाडिया कनिष्ठ महाविद्यालय
- पूना कॉलेज ऑफ आर्ट्स अँड सायन्स
- एस. एम. चौकसी कनिष्ठ महाविद्यालय
- एस. एम. जोशी कनिष्ठ महाविद्यालय
- सेंट उर्सुला कनिष्ठ महाविद्यालय
- सरदार दस्तूर कनिष्ठ महाविद्यालय
- एसपी कनिष्ठ महाविद्यालय
- सेंट विन्सेंट कनिष्ठ महाविद्यालय
- सिम्बायोसिस कनिष्ठ महाविद्यालय
द्विलक्ष्यी (बायफोकल) अभ्यासक्रमांच्या प्रवेशासाठी अर्ज केलेल्या ४ हजार ७६२ विद्यार्थ्यांपैकी १ हजार ९६६ विद्यार्थ्यांना प्रवेश यादीत स्थान मिळालेले नाही. या विद्यार्थ्यांपैकी अनेक विद्यार्थ्यांना ९० टक्क्यांपेक्षा अधिक गुण आहेत. त्यामुळे चांगले गुण मिळूनही प्रवेश मिळत नसल्याने विद्यार्थी आणि पालकांत संभ्रम निर्माण झाला आहे. महाविद्यालयांच्या प्रवेशाचे कटऑफ गुण जाहीर न झाल्याने विद्यार्थी-पालकांना माहिती मिळत नसून, ते चिंतित आहेत. त्यामुळे कटऑफ गुण जाहीर करण्याची मागणी विद्यार्थी-पालकांनी केली आहे.
१०,०६०
द्विलक्ष्यी अभ्यासक्रमांच्या एकूण जागा
४,७६२
एकूण प्राप्त अर्ज
२,७९६
प्रवेश जाहीर झालेल्या विद्यार्थ्यांची संख्या
१,९६६
प्रवेश जाहीर न झालेल्या विद्यार्थ्यांची संख्या
७,२६४
रिक्त जागा