म. टा. प्रतिनिधी, पुणे
खरेदी केलेल्या फ्लॅटवरील मुद्रांक व नोंदणी शुल्क शासनाने माफ केलेले असतानासुद्धा सोसायटीबरोबर अॅग्रिमेंट करावे लागते, असे सांगून उपनिबंधक आणि वकिलांना ७५ हजार रुपये द्यायचे असल्याचे सांगून लाच घेतल्याप्रकरणी अटक केलेल्या सचिवाच्या पोलिस कोठडीत १२ सप्टेंबरपर्यंत वाढ करण्यात आली.
या प्रकरणी, कोंढवा परिसरातील संत ज्ञानेश्वरनगरमधील भगवान गौतम बुद्ध गृहनिर्माण संस्थेचा सचिव दिलीप संतराम कांबळे (४५) याला अटक करण्यात आली आहे. या प्रकरणी ३६ वर्षीय तक्रारदाराने फिर्याद दाखल केली आहे. कांबळे हा लाच मागत असल्याप्रकरणी तक्रारदाराने एसीबीकडे तक्रार दाखल केली होती. तक्रारदाराने खरेदी केलेल्या फ्लॅटवरील मुद्रांक शुल्क व नोंदणी शुल्क शासनाने माफ केले होते, तरी आरोपीने त्यांच्याकडे सोसायटीबरोबर अॅग्रिमेंट करावे लागते व त्यासाठी उपनिबंधक आणि वकिलांना ७५ हजार रुपये द्यायचे असल्याचे सांगून लाच मागितली होती. कांबळेला लाच घेताना रंगेहाथ पकडण्यात आले होते. त्याच्या पोलिस कोठडीची मुदत संपल्यामुळे सोमवारी त्याला कोर्टात हजर करण्यात आले होते. त्याच्याकडे अधिक तपास करण्यासाठी पोलिस कोठडीत वाढ करण्यात यावी, अशी मागणी सरकारी वकील प्रेमकुमार अगरवाल यांनी कोर्टात केली.
आरोपीने घेतलेली लाचेची रक्कम कोणासाठी स्वीकारली, यात दुय्यम निबंधक कार्यालयातील कुणाचा सहभाग आहे का, या गृहरचना संस्थेच्या चेअरमनकडे आरोपीच्या समक्ष तपास करायचा आहे. संस्थेच्या चेअरमनने यापूर्वी अशा प्रकारचे खरेदीखत केल्याची माहिती मिळाली असून, त्याचा तपास करायचा आहे. हवेली दुय्यम निबंधक कार्यालयातून या संस्थेच्या सदनिकांचे खरेदीखत वकिलाकडून करून घेण्यात आल्याचा तपास करायचा असून, त्यासाठी आरोपीची पोलिस कोठडी देण्याची मागणी सरकारी वकील अगरवाल यांनी केली.