कार विक्रीची संख्या उल्लेखनीय
म. टा. प्रतिनिधी, पुणे
चालू वर्षात आर्थिक मंदीचा सामना करत असलेल्या वाहन उद्योग क्षेत्रासाठी यंदाचा दसरा आनंदवार्ता घेऊन आला. यंदा दसऱ्याच्या मुहूर्तावर गेल्या वर्षीच्या तुलनेत अधिक वाहनांची विक्री झाली आहे. त्यामध्ये कार विक्रीची संख्या उल्लेखनीय आहे.
दसरा, गुढी पाडवा, दिवाळीचा पाडवा आणि अक्षय तृतीया या साडेतीन मुहूर्तांवर मोठ्या प्रमाणात वाहन खरेदी केली जाते. मात्र, गेल्या वर्षी दसऱ्याच्या मुहूर्तावर वाहनांच्या विक्रीत घट झाली होती. त्यामुळे यंदा मंदीची समस्या भेडसावत असतानाही वाहन विक्रीवर त्याचा परिणाम न झाल्याने बाजारात उत्साहाचे वातावरण आहे. यंदा दसऱ्याच्या मुहूर्तावर पाच हजार ९३२ वाहनांची प्रादेशिक परिवहन कार्यालयाकडे (आरटीओ) नोंदणी झाली. त्यामध्ये तीन हजार ८५२ दुचाकी आणि एक हजार १५ चारचाकी वाहनांचा समावेश आहे. या नोंदणीमुळे आरटीओला २३ कोटी १९ लाख २५ हजार ५८९ रुपये महसूल मिळाला आहे. गेल्या वर्षाची तुलना करता यंदा दुचाकीमध्ये २६३ ने घट झाली आहे. कारच्या विक्रीत ५४५ ने वाढ झाल्याने एकूण संख्येतही वाढ दर्शवित आहे, अशी माहिती उपप्रादेशिक परिवहन अधिकारी विनोद सगरे यांनी दिली. यंदाच्या वर्षात गुढी पाडव्याला झालेल्या वाहनांच्या विक्रीत गेल्या वर्षाच्या तुलनेत किंचित घट होती.
.
दसऱ्याच्या मुहूर्तावर झालेली वाहन विक्री
वर्ष दुचाकी चारचाकी
२०१७ ५७४१ २०७५
२०१८ ४११५ ९७०
२०१९ ३८५२ १५१५
.
ठळक आकडे
८,६८९
२०१७ मध्ये दसऱ्याला झालेली वाहन विक्री
.
५,८५०
२०१८मध्ये दसऱ्याला झालेली वाहन विक्री
.
५,९३२
२०१९ मधील वाहन विक्री
....