राष्ट्रध्वज उभारणी प्रस्ताव बासनातच

भाजपच्या नगरसेवकांवर सर्व स्तरातून टीकेची झोड

म. टा. प्रतिनिधी, पुणे

प्रभागातील विकास कामांसाठीच्या निधीचे वर्गीकरण करून पर्वती येथे राष्ट्रध्वज उभारण्याचा प्रस्ताव भारतीय जनता पक्षाच्या नगरसेवकांनी अखेर मागे घेतला. नगरसेवकांच्या या प्रस्तावावर सर्वच स्तरांतून टीकेची झोड उठल्याने त्यांना हा प्रस्ताव मागे घेण्याशिवाय गत्यंतर राहिले नाही.
हा प्रस्ताव मागे घेतल्याची माहिती स्थायी समितीचे अध्यक्ष मुरलीधर मोहोळ यांनी मंगळवारी पत्रकार परिषदेत दिली. भविष्यात वर्गीकरणाचा प्रस्ताव देताना विकास कामांच्या निधीला धक्का लागणार नाही, याची काळजी घेण्याच्या सूचनाही नगरसेवकांना करण्यात आल्याचे त्यांनी स्पष्ट केले.
विकासकामांसाठीच्या ७० लाख रुपयांच्या निधीचे वर्गीकरण करून त्यातून पर्वती येथील देवदेवेश्वर संस्थान येथे राष्टध्वज उभारण्याचा प्रस्ताव नवी पेठ, पर्वती (प्रभाग क्रमांक २९) मधील भाजपचे नगरसेवक धीरज घाटे, सरस्वती शेंडगे यांनी दिला होता. प्रभागातील नागरिकांना पुरेसे पाणी मिळावे यासाठी पाइपलाइन टाकण्यासाठी ठेवण्यात आलेल्या निधीबरोबरच उघडा नाला बंदिस्त करून त्याचे सुशोभीकरण करणे, ओटा मार्केट तयार करणे, नवीन पथदिवे बसविणे आदी महत्त्वाच्या कामांसाठी ठेवण्यात आलेल्या निधीचे वर्गी‍करण करून निधी देण्याची मागणी प्रस्तावात करण्यात आली होती.
पालिकेतील सत्ताधारी पक्षाच्या नगरसेवकांनीच हा अनोखा प्रस्ताव दिल्याचे वृत्त सर्वप्रथम ‘मटा’ने प्रसिद्ध केले होते. त्यानंतर सर्वच स्तरातून सत्ताधाऱ्यांच्या भूमिकेवर जोरदार टीका झाली. स्थायी समिती यावर नक्की काय निर्णय घेणार, असा प्रश्न विचारला जात होता. मंगळवारी झालेल्या समितीच्या बैठकीत हा प्रस्ताव संबधित नगरसेवकांनी मागे घेतल्याची माहिती मोहोळ यांनी दिली. प्रभागातील विकास कामांबरोबरच नागरिकांना आवश्यक असलेल्या पायाभूत सुविधा पुरविण्यासाठी निधी राखीव ठेवला जातो. महत्वाच्या कामांसाठी ठेवण्यात आलेल्या निधीचे वर्गीकरण करण्याचे प्रस्ताव देताना भविष्यात काळजी घ्यावी, अशा सूचना सर्वांनाच करण्यात आल्याचे मोहोळ यांनी सांगितले.