म. टा. प्रतिनिधी, पिंपरी
संत तुकाराम महाराज यांच्या पालखी सोहळ्याचे पिंपरी चिंचवड उद्योगनगरीत मंगळवारी (२५ जून) जयघोषात आगमन झाले. पालखी आगमनाच्या वेळीच आकाशात ढग दाटून आले होते. पालखीच्या स्वागतासाठीच जणू वरुणराजाने जोरदार हजेरी लावली. तरीही भाविकांचा उत्साह कमी झाला नाही. तुकोबांच्या पादुकांचे दर्शन घेण्यासाठी भाविकांनी गर्दी केली होती. सावळ्या विठुरायाच्या ओढीने पंढरपूरकडे निघालेल्या संत तुकाराम महाराजांच्या पालखी सोहळ्याचे आगमन निगडीच्या भक्ती-शक्ती चौकात साधारण ५.१० मिनिटांनी झाले. त्यानंतर पालखीवर हेलिकॉप्टरच्या साह्याने पुष्पवृष्टी करण्यात आली.
खांद्यावर भगव्या पताका आणि हरिनामाचा गजर करीत दिंड्या मार्गक्रमण करीत निगडी जकात नाक्याजवळ पोहोचत असतानाच मुंबई-पुणे महामार्गावर दुतर्फा भाविकांनी ठिकठिकाणी गर्दी करण्यास सुरुवात केली. गळ्यात तुळशीच्या माळा आणि कपाळावर केशरीगंध लावलेल्या वारकऱ्यांच्या दिंड्या नाक्याजवळ येताच आबालवृद्ध भाविकांचा उत्साह दुणावला. पालखी रथाचे दिसताच पादुकांचे दर्शन घेण्यासाठी भाविकांची एकच गर्दी उसळली होती. भाविकांनी तुकोबांच्या पालखीचे मनोभावे दर्शन घेतले.
निगडीत दाखल झाल्यानंतर पालखीच्या रथाचे सारथ्य महापौर राहुल जाधव, आमदार महेश लांडगे, लक्ष्मण जगताप यांनी केले. पालखी सोहळ्यात आयुक्त श्रावण हर्डीकर, सत्तारुढ पक्षनेते एकनाथ पवार, स्थायी समिती अध्यक्ष विलास मडेगिरी, अतिरिक्त आयुक्त संतोष पाटील, नगरसेवक आदी उपस्थित होते. सकाळी देहूच्या इनामदार वाड्यातून पालखीचे प्रस्थान झाले. त्यानंतर अनगडशाह बाबा दर्गा येथे दुपारी आरती झाली. माळवाडी, झेंडेमळा, देहूरोड येथील नागरिकांचे आदरातिथ्य स्वीकारून आणि देहूकरांचा निरोप घेऊन पुणे-मुंबई महामार्गाने पालखी निगडी परिसरातील भक्ती-शक्ती चौकात पोहोचली. संध्याकाळी निगडीच्या भक्ती-शक्ती चौकात भव्य स्वागत झाल्यानंतर पालखी आकुर्डी दत्तवाडी विठ्ठल मंदिराच्या दिशेने रवाना झाली. वारकऱ्यांच्या भगव्या पताका आणि टाळ-मृदुंगाच्या गजराने उद्योगनगरी भक्तीरसात न्हाऊन निघाली.
दिंड्यांना मृदंगाची भेट
यंदा महापालिकेच्या निधीतून वारकऱ्यांना भेटवस्तूंचे वाटप करण्यात आले नाही. महापौर, नगरसेवक आणि पदाधिकाऱ्यांच्या वतीने वारकऱ्यांना मृदंगवाटप करण्यात आले. प्रत्येक दिंडीप्रमुखाला एक असे एकूण ३५० मृदंगांचे वाटप करण्यात आले.
स्वच्छतेसाठी सरसावले विद्यार्थी, संस्था
तळेगावच्या नूतन महाराष्ट्र इन्स्टिट्यूट अँड टेक्नॉलॉजीच्या ५५ विद्यार्थ्यांनी स्वच्छतेसाठी पुढाकार घेतला. कर्तव्य फाउंडेशनच्या ११ सदस्यांनी देखील पालखीमार्गात झालेला कचरा वेचला. स्वच्छतेसाठी विद्यार्थ्यांसह सामाजिक संस्थांचा सहभाग पाहायला मिळाला.
विविध संघटनांकडून अन्नदान
- आई एकविरा फाउंडेशनतर्फे ३०० किलो खिचडीचे वाटप करण्यात आले. फाउंडेशन ११ वर्षाहून अधिक काळ वारकऱ्यांची सेवा करत आहे. सुमारे ८ ते १० हजार वारकऱ्यांना खिचडीचे वाटप करण्यात आले. प्रशांत पाटील यांच्यासह कार्यकर्त्यांनी खिचडीचे वाटप केले.
- पुणे वृत्तपत्र विक्रेता संघाच्या निगडी शाखेच्या वतीने चहा व केळीचे वाटप करण्यात आले. विश्वास पाफळे, धुळा हिवरे आदींसह कार्यकर्त्यांनी वाटप केले.
- फार्मा मार्केटिंगच्या ५० कार्यकर्त्यांनी बिस्कीट वाटप करून वारकऱ्यांना सेवा दिली.
- जन क्रांती सेनेच्या वतीने बिस्किटांचे वाटप करण्यात आले. आकुर्डी गावातील स्वस्त धान्य दुकानदारांच्या वतीने वारकऱ्यांना मोफत केरोसिनचे वाटप करण्यात आले.
- लातूर जिल्हा मित्र मंडळाच्या वतीने चपाती भाजीचे वाटप करण्यात आले. लोकशाहीर अण्णा भाऊ साठे नगर, निगडीतर्फे चहा व पाणी वाटप करण्यात आले.
साहित्याचे वाटप
- फिनोलेक्स कंपनीच्या वतीने वारकऱ्यांना साहित्य भिजू नये म्हणून पिशव्यांचे वाटप करण्यात आले; तसेच रेनकोटचेही वाटप करण्यात आले.
- राज्य शासनाच्या सार्वजनिक बांधकाम विभागाच्या वतीने पिण्याच्या पाण्याच्या टाकीची सोय करण्यात आली होती.
- पिंपरी चिंचवड महानगरपालिकेच्या थेरगाव शाळेच्या विद्यार्थ्यांनी पोवाड्यातून जनजागृती केली. विविध सामाजिक विषय घेऊन विद्यार्थ्यांनी पोवाडा सादर केला.
मोफत केश कर्तनसेवा
महाराष्ट्र नाभिक महामंडळ व सलमानी जमात वेलफेअर असोसिएशनच्या वतीने मोफत केस आणि दाढी कटिंग सुविधा देण्यात आली. गेली ११ वर्षे ही सुविधा दिली जात आहे.
आरोग्य सेवा
अखिल शरद लुणावत यांच्या स्मरणार्थ जगदगुरू संत तुकाराम महाराज पालखी सोहळा समन्वय समितीतर्फे मोफत आरोग्य तपासणी शिबिराचे आयोजन करण्यात आले. विश्व श्रीराम सेनेच्या वतीने मोफत आरोग्य तपासणी शिबिराचे आयोजन करण्यात आले. संस्कार प्रतिष्ठानतर्फे वारकऱ्यांसाठी मोफत आरोग्य शिबिराचे आयोजन करण्यात आले होते. स्टर्लिंग मल्टी स्पेशालिटी हॉस्पिटलतर्फे मोफत आरोग्यसेवा देण्यात आली. याचा ४ ते ५ हजार वारकऱ्यांनी लाभ घेतला.