म. टा. प्रतिनिधी, पिंपरी
पिंपरी-चिंचवड औद्योगिक नगरीतील 'कंटेन्मेंट झोन' वगळून उद्योग सुरू करण्यास राज्य सरकारने गुरुवारी (१४ मे) परवानगी दिली आहे. राज्याचे मुख्य सचिव अजय मेहता यांनी याबाबतचे आदेश काढले आहेत. या आदेशामुळे चाळीसहून अधिक दिवसांनंतर उद्योगनगरीतील यंत्रांचा खडखडाट सुरू होणार आहे. दरम्यान, सुरू होणाऱ्या कंपन्यांमध्ये शहरातील कामगार काम करतील; तसेच त्यांची संख्या ३३ टक्केच असणे बंधनकारक आहे.
पिंपरी-चिंचवड औद्योगिकनगरीत टाटा मोटर्स, बजाज, महिंद्रा या मोठ्या कंपन्यांसह 'एमआयडीसी'तील लघुउद्योग आहेत. सुमारे ११ हजार सूक्ष्म, लघु व मध्यम उद्योग आणि कारखाने आहेत. 'लॉकडाउन'मुळे २२ मार्चपासून हे उद्योग बंद होते. त्यामुळे उद्योजक अडचणीत आले होते. सरकारकडे उद्योग सुरू करण्याची मागणी लावून धरली होती. अखेर राज्य सरकारने पिंपरी-चिंचवड शहरातील उद्योग सुरू करण्यास परवानगी दिली आहे. कंपन्यांमध्ये काम करण्यासाठी शहरातील रहिवासी असलेले कामगार असावेत. ३३ टक्केच कामगारांची हजेरी असावी. कंपनीची बस अथवा त्यांच्या चारचाकी वाहनातूनच कामगारांनी प्रवास करावा, असे काही नियम पाळने बंधनकारक असणार आहे.
लॉकडाउन सुरू झाल्यापासून पिंपरी-चिंचवड शहरातील सर्वच कंपन्या; तसेच लहान मोठे लघुउद्योग बंद झाले होते. लघुउद्योग बंद असल्यामुळे तब्बल चार लाख नागरिकांच्या रोजगारावर कुऱ्हाड कोसळली होती. 'लॉकडाउन' वाढत गेल्यामुळे या लघुउद्योग मालकांनाही मोठा फटका बसला होता.
कोट
सरकारने पिंपरी-चिंचवड शहरातील कंटेन्मेंट झोन वगळून उद्योग सुरू करण्यास परवानगी दिली आहे. ३३ टक्के कामगारांच्या उपस्थितीत उद्योग सुरू करायचे आहेत. त्यामध्ये काही अटी-शर्ती आहेत. त्यानुसार शुक्रवारी त्याचे आदेश काढले जातील. कंपन्यांमध्ये केवळ शहरातीलच कामगार असतील. शहराबाहेरील कामगार येणार नाहीत. त्यांना कंपनीची बस किंवा खासगी चारचाकी गाडीतून जावे लागणार आहे. दुचाकीवरून कोणीही जा-ये करू शकणार नाही.
- श्रावण हर्डीकर, आयुक्त, पिंपरी-चिंचवड महापालिका
कोट
उद्योग सुरू करण्यासाठी पिंपरी-चिंचवड लघुउद्योग संघटनेने सातत्याने पाठपुरावा केला. त्याला यश आले आहे. खासकरून उपमुख्यमंत्री आणि जिल्ह्याचे पालकमंत्री अजित पवार यांचे विशेष आभार मानतो. हा सकारात्मक निर्णय घेतल्याबद्दल मुख्यमंत्री उद्धव ठाकरे यांचेही आभार. महापालिकेने आम्हाला परवानगीच्या खेळामध्ये अडकवू नये.
- संदीप बेलसरे, अध्यक्ष पिंपरी-चिंचवड लघुउद्योग संघटना