इंग्रजीचे स्पेलिंग चुकले, विद्यार्थ्याला मारहाण

पिंपरी (पुणे): गृहपाठात इंग्रजीचे स्पेलिंग चुकले म्हणून शिक्षिकेने विद्यार्थ्याचे डोके बेंचवर आपटून अमानुष मारहाण केली. भोसरी येथील स्वामी समर्थ इंग्लिश मिडियम स्कूलमध्ये गुरुवारी (१५ मार्च) ही घटना घडली आहे. विद्यार्थ्याचे वडील

रवींद्र कौतिक चव्हाण यांनी याबाबत भोसरी पोलिस ठाण्यात फिर्याद आहे. तर शिक्षिका ईशा (पूर्ण नाव पत्ता उपलब्ध नाही) यांच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, भोसरीतील धावडे वस्तीत राहणारे रवींद्र चव्हाण यांचा सहा वर्षीय मुलगा सुमित हा इंद्रायणीनगर भोसरी येथील स्वामी समर्थ इंग्लिश मीडियम स्कूलमध्ये शिकत आहे. गुरुवारी दुपारी साडेतीनच्या सुमारास गृहपाठ वहित स्पेलिंग लिहिताना चूक झाल्याचे सांगत सुमित यास छडीने पाठीवर मारहाण केली. तसेच त्याचे डोके बेंचवर आपटून त्यास गंभीर जखमी केले असे, चव्हाण यांनी दिलेल्या फिर्यादीत नमूद करण्यात आले आहे.

याबाबत शिक्षिकेविरुद्ध भोसरी पोलिस ठाण्यात गुन्हा दाखल करण्यात आला आहे. भोसरी पोलीस या प्रकरणाचा तपास करत आहेत.