उलगडले अंतरंग अवलिया कलाकाराचे

पुणे : वैद्यकीय क्षेत्रात राहूनही जपलेला साहित्याचा व्यासंग... लेखनातून उतरणारं नव्या काळाचं सजग भान... संगीताबद्दल असलेली आत्मीयता, जाण आणि त्यातून होणारी नवनिर्मिती... नव्या पिढीबाबत असलेली स्वीकारार्हता आणि आशावाद... असे अनेक पैलू उलगडले. निमित्त होते लेखक, कवी, संगीतकार डॉ. आशुतोष जावडेकर यांच्या मुलाखतीचे.

पिंपरी-चिंचवड परिसरातील ‘जिप्सी’ संस्थेतर्फे डॉ. जावडेकर यांच्या मुलाखतीचे आयोजन करण्यात आले होते. शीर्षक होते ‘आशुतोष ऑनलाइन’. त्यांना बोलते केले निवेदिका स्नेहल दामले यांनी.

‘वाचनाची गोडी घरातच लागली. आईने घरात खूप पुस्तके आणली होती. त्याचा फायदा झाला. मी जे काही वाचले, ते सखोल वाचले. त्यातूनच लेखनाची ऊर्मी निर्माण झाली,’ असे ते म्हणाले. त्यांनी लिहिलेली ‘नवे सूर, नवे तराणे’ आणि ‘लयपश्चिमा’ ही संगीतविषयक पुस्तके; तसेच ‘मुळारंभ’ या कादंबरीचा लेखनप्रवासही जावेडकर यांनी उलगडला. ‘वीण’, ‘आस’, ‘निर्धार’ या त्यांच्या संगीत अल्बमविषयीही त्यांनी संवाद साधला.

‘आजची तरुण पिढी बिनधास्त आहे; पण तितकीच रिसेप्टिव्ह आहे आणि म्हणूनच मी खूप आशावादी आहे,’ असे सांगत त्यांनी नव्या पिढीविषयीची आत्मीयता व्यक्त केली. डेंटिस्ट म्हणून पूर्ण वेळ काम करताना साहित्य, संगीत अशा विविध क्षेत्रांतील मुशाफिरी पत्नी मानसी हिच्या पाठिंब्यामुळे शक्य होते, असेही त्यांनी नमूद केले. ‘जिप्सी क्लब’तर्फे विकास नामजोशी यांनी त्यांचा सत्कार केला. निनाद थत्ते यांनी आभार मानले.