म. टा. प्रतिनिधी, पुणे
हॉटेलमध्ये जेवणासाठी टेबल बुक करण्यासाठी आगाऊ पैसे देण्यासाठी लिंक पाठवून एका तरुणीची ऑनलाइन ९८ हजार रुपयांची फसवणूक केल्याचा प्रकार समोर आला आहे. या प्रकरणी सायबर पोलिस ठाण्यात गुन्हा दाखल करण्यात आला आहे.
याबाबत पर्वती परिसरातील २९ वर्षीय तरुणीने तक्रार दिली. त्यानुसार अज्ञात मोबाइलधारक व्यक्तीवर गुन्हा दाखल करण्यात आला. तीन नोव्हेंबर २०१९ रोजी हा प्रकार घडला. पोलिसांनी दिलेल्या माहितीनुसार, हॉटेलमध्ये जेवण करण्यासाठी जाणाऱ्या ग्राहकांना गर्दीमुळे जास्त वेळ ताटकळत बसण्याची वेळ येऊ नये, यासाठी टेबलाची ऑनलाइन पद्धतीने आगाऊ नोंदणी करण्याचे काम काही कंपन्यांकडून केले जाते. तक्ररादार यांना हॉटेलमध्ये जेवण करण्यासाठी जायचे होते. त्यानुसार त्यांनी इंटरनेटद्वारे हॉटेलची माहिती घेण्याचा प्रयत्न केला. त्या वेळी एका तक्रारदारला त्यांनी फोन केला. एका नामांकित हॉटेलमधून बोलत असल्याचे सांगितले. हॉटेलमध्ये आगाऊ टेबल बुक करण्यासाठी किमान आगाऊ २५ रुपये तरी भरावे लागतील, असे सांगितले. त्यासाठी आरोपींनी मोबाइलवर एसएमएसद्वारे एक लिंक तरुणीला पाठविली. त्या लिंकमध्ये आरोपींनी विचारलेली सर्व माहिती भरली. त्याच्या आधारे आरोपीने यूपीआय पिनचा वापर करून तक्रारदार तरुणीच्या खात्यामधील ९८ हजार रुपये ऑनलाइन काढून घेत फसवणूक केली. हा प्रकार समोर आल्यानंतर तरुणीने सायबर पोलिसांकडे तक्रार दिली होती. त्यानुसार गुन्हा दाखल करून तो दत्तवाडी पोलिसांकडे वर्ग केला आहे. त्यानुसार दत्तवाडी पोलिस अधिक तपास करत आहेत.