तू ये तुझा काटा काढतो, ५०० रुपयांचा वाद अन् ट्रॅव्हल व्यावसायिकानं जीव गमावला...

जुन्नर: क्रुझर गाडीचे दुरुस्ती काम केल्यानंतर झालेल्या बिलातले ५०० रुपये दिले नाहीत. या किरकोळ कारणावरून आळेफाटा येथील ट्रॅव्हल व्यावसायिक विनायक उर्फ संतोष बबन गोडसे (वय ४२ रा. पिंपळवंडी, ता. जुन्नर) यांचा आळेफाटा येथे एका फिटरने चाकूने भोसकून खून केला. मयूर अशोक सुर्यवंशी (रा. राजुरी, ता. जुन्नर) असे आरोपीचे नाव आहे. मंगळवारी (२४ जानेवारी) रात्रीच्या सुमारास ही घटना घडली.

विनायक गोडसे यांचा खून केल्यानंतर आरोपीने स्वत:ला देखील चाकू मारून जखमी केले. जखमी अवस्थेत आरोपी मयूरला पोलीस बंदोबस्तात खासगी दवाखान्यात दाखल करण्यात आले आहे. त्याच्याविरोधात खूनाचा गुन्हा दाखल करण्यात आल्याची माहिती आळेफाटा पोलीस ठाण्याचे निरीक्षक यशवंत नलावडे यांनी दिली. याप्रकरणी मृताचा मित्र सचिन जाधव याने फिर्याद दिली आहे.

अधिक माहितीनुसार मृत गोडसे यांनी त्यांची क्रुझर गाडी आरोपीकडे दुरुस्तीसाठी दिली होती. दुरूस्तीचे ७ हजार ६०० बील झाले होते. त्यातील ७ हजार १०० रुपये गोडसे यांनी आरोपीला दिले होते. त्यातले ५०० रुपये देणे बाकी होते. हे पैसे तो अनेकदा गोडसे यांच्याकडे मागत होता. ते पैसे दिले नाहीत या कारणावरुन दोघांची फोनवर बाचाबाची झाली. त्यावेळी आरोपीने तू ये तुझा काटा काढतो, असं म्हणत त्याला धमकावलं दिले.

हे ऐकून संतापलेले गोडसे हे त्याच्याकडे गेले असता आरोपीने गोडसे यांच्या छातीत आणि बगलेत सुरा खूपसला. त्यात गोडसे हे जखमी झाले होते. त्यावेळी फिर्यादी असलेले त्यांचे मित्र सचिन जाधव यांनी गोडसे यांना खासगी दवाखान्यात नेले. मात्र, डॉक्टरांनी पुण्याला हलवायला सांगितल्याने अॅम्बुलन्सने पुण्याला हलवत होते. मात्र, वाटेतच गोडसे यांचा मृत्यू झाला. आरोपी सुर्यवंशी याने केवळ ५०० रुपयांसाठी गोडसे यांचा जीव घेतल्यानेपरिसरात हळहळ व्यक्त होत आहे.