खडकवासला, धामणी, कवडास तुडुंब

पुणे/पालघर:

गेल्या काही दिवसांतील जोरदार पावसामुळं तुडुंब भरलेल्या पुण्यातील खडकवासला धरणाचे दोन दरवाजे आज सकाळी उघडण्यात आले. त्यामुळं पुणे मेट्रोचं काम थांबवण्यात आलं आहे. दुसरीकडं, पावसानं सर्वाधिक झोडपलेल्या पालघर जिल्ह्यातील धामणी व कवडास धरणाचेही प्रत्येकी पाच दरवाजे उघडण्यात आले असून सूर्या नदीकाठच्या गावांना सतर्कतेचा इशारा देण्यात आलाय.

खडकवासला धरणातून १७१२ क्युसेक्स पाण्याचा विसर्ग सुरू आहे. हे पाणी मुठा नदीत सोडण्यात आलं आहे. त्यामुळं जिमखाना आणि संभाजी उद्यानाच्या मागील बाजूस सुरू असलेले मेट्रोचे काम थांबविण्यात आले आहे. पाण्याचा विसर्ग थांबल्यानंतरच काम पुन्हा सुरू करण्याबाबत निर्णय घेतला जाणार आहे.

पालघर जिल्ह्यातील सिंचनासाठी बंधलेल्या सूर्या प्रकल्पातील कवडास व धामणी धरण पूर्ण भरून वाहू लागल्यानं या धरणाचे दरवाजे सकाळी साडे अकरा वाजता उघडण्यात आले. धामणीचे ५ दरवाजे ३ फुटांपर्यंत उघडण्यात आलेत. त्यातून प्रति सेकंद ९९०० क्युसेक्स पाण्याचा विसर्ग होत आहे, तर कवडास धरणातून सेकंदाला तीस हजार क्युसेक्स पाण्याच्या विसर्ग होत आहे. मात्र, येथील परिस्थिति नियंत्रणात असल्याचं जिल्हा प्रशासनाकडून सांगण्यात आलंय.