‘नोटाबंदी’च्या कवितांनी रंगली धूळवड

कविसंमेलनाला उत्स्फूर्त प्रतिसाद; सचिन पिळगावकर यांना जीवन कला गौरव पुरस्कार प्रदान
म. टा. प्रतिनिधी, पुणे
‘नोटाबंदी’नंतरही भाजपने निवडणुकांमध्ये अभूतपूर्व यश मिळवून होळी साजरी केलेली असताना, महाराष्ट्रातील कवींनी मात्र ‘नोटाबंदी’चा चांगलाच समाचार घेत धूळवड खेळली. ‘उरात होतंय धडधड बंदी नोटांवर आली, हजार पाचशे बदलून घ्या मोदींची आज्ञा झाली, अधीर झालोया आता बधीर झालोया, ब्लॅक मनी हा व्हाइट करता जेरीस आलोया, उडतोय बुंगाट पळतोय चिंगाट आंगलट आलंया, झालंय झिंगझिंग झिंगाट...’ ‘तुम्ही नोटा थोड्याच बंद केल्या ? काही दिवसासाठी का होईना, शेतकऱ्यांच्या जगण्याच्या वाटाच बंद केल्य..’ ‘नोटा बदलल्या तरी पोटातला खड्डा अजून तसाच आहे, नोटांचे रंग बदलले तरी गरिबीचा रंग तसाच आहे...’ अशा कवितांतून ‘नोटाबंदी’च्या निर्णयावर रंग उधळले गेले. मार्मिक, हसवत, विचारास प्रवृत्त करणाऱ्या कवितांनी होळीची रात्र रंगत गेली.
निमित्त होते, स्व. प्रकाश ढेरे चॅरिटेबल ट्रस्ट व गंगा लॉज मित्र मंडळ यांच्यातर्फे आयोजित कविसंमेलनाचे. टिळक स्मारक मंदिरात रविवारी रात्री रंगलेल्या मैफलीत स्व. यशवंतराव चव्हाण यांच्या जयंतीनिमित्त प्रकाश ढेरे स्मृत्यर्थ ‘जीवन कला गौरव पुरस्कार’ ज्येष्ठ अभिनेते सचिन पिळगावकर यांना प्रदान करण्यात आला. शिवाजीराव ढेरे यांच्या स्मृत्यर्थ पुरस्कार वीरधवल परब, शांताबाई अमृतराव ढेरे स्मृत्यर्थ पुरस्कार साहेबराव ठाणगे, धनाजी जाधव स्मृत्यर्थ पुरस्कार डी. के. शेख यांना देण्यात आला. बाबासाहेब जाधव, संजय ढेरे, कुणाल जाधव या वेळी उपस्थित होते. ट्रस्टचे अध्यक्ष रामदास फुटाणे यांनी सूत्रधाराची भूमिका समर्थपणे बजावून काव्यमैफल रंगवली. कविसंमेलनात सचिन, परब, ठाणगे व शेख यांच्यासह सुरेश शिंदे, अरुण म्हात्रे, संदीप खरे, प्रशांत मोरे, संदीप जगताप, प्रशांत केंदळे, विजय चोरमारे, प्रकाश घोडके, तुकाराम धांडे, भरत दौंडकर, नारायण पुरी, अनिल दीक्षित, अशोक थोरात, आबेद शेख, नितीन देशमुख, हर्षदा सौरभ, बालिका बिटले यांनी काव्यरचना सादर केल्या.
वाक्यागणिक हसविणाऱ्या, टाळ्या-शिट्ट्या घेणाऱ्या कविता रसिकांना अंतर्मुखही करत होत्या. रात्री एक वाजेपर्यंत रंगलेल्या या मैफलीला रसिकांनी अभूतपूर्व प्रतिसाद दिला. कवींनी कवितेतून धूळवड खेळलीच, पण फटाकेही फोडले. ‘जांगड गुत्ता ग जीव झाला हा खलबत्ता ग’, ‘अगदी कपडे वाळत घालण्यातही दडलेल असतं बाईचं व्यवस्थापन’, ‘कितीही चमकल तरी कल्हईची चांदी होत नाही, चरख्याच्या शेजारी फोटो छापला म्हणून कोणी गांधी होत नाही’, ‘ए राजकारण करतोयस का’, ‘निळा पोपट...’ अशा कवितांनी धम्माल आणली आणि त्याच वेळेस डोळ्यात झणझणीत अंजन घातले.
-----------------------------
महाराष्ट्राने जी साथ दिली. त्या ताकदीपोटीच यश मिळवू शकलो. एका बाईला विचारले की भारताचा राष्ट्रीय पक्ष कोण तर उत्तर दिले शरद पवार. याप्रमाणेच माझे राजकारणातील ज्ञान शून्य आहे. ज्या क्षेत्रात मी आहे, तेच ज्ञान मला नाही, तर राजकारणाचे कुठून येणार ? केवळ चॉकलेटी भूमिका का मिळतात, याचा राग यायचा; पण प्रेक्षक खूश झाले पाहिजे, तेच आपले आहे.
- सचिन पिळगावकर, अभिनेता, दिग्दर्शक