​सनबर्न फेस्टिव्हलला कायद्याने परवानगी

पुणे ः पुण्यात केसनंद येथे सुमारे ५० एकर जागेवर ‘सनबर्न फेस्टिव्हल’ होत असून, त्यास राज्याच्या पर्यटन खात्याचा ‘नॉन फायनान्शियल सपोर्ट’ आहे. या महोत्सवाला कायद्यानुसार परवानगी देण्यात आली आहे,’ असे राज्याचे पर्यटनमंत्री जयकुमार रावल यांनी सांगितले.
‘पुण्यात २८ ते ३१ डिसेंबर या कालावधीत केसनंद येथे हा महोत्सव होणार आहे. त्यामध्ये संगीत आणि मनोरंजनाचे कार्यक्रम होणार आहेत. हा महोत्सव गेल्या दहा वर्षांपासून गोव्यामध्ये आयोजित करण्यात येत होता. पहिल्यांदाच पुण्यात हा महोत्सव होणार आहे. राज्याच्या पर्यटन खात्याने ‘नॉन फायनान्शियल सपोर्ट’ केला आहे. कायद्यानुसार परवानगी देण्यात आली आहे. मात्र, कायद्याचे उल्लंघन झाल्यास संबंधितांवर कारवाई केली जाईल,’ असे रावल यांनी पत्रकार परिषदेत सांगितले. या वेळी भाजपच्या आमदार माधुरी मिसाळ उपस्थित होत्या.
ते म्हणाले, ‘पुण्यामध्ये महाराष्ट्र पर्यटन विकास महामंडळाने २८ वर्षांपूर्वी ‘पुणे फेस्टिव्हल’ सुरू केला. या माध्यमातून पुणे शहराचा नवीन चेहरा समोर येत गेला. ‘पुणे आंतरराष्ट्रीय फिल्म फेस्टिव्हल’मध्येही महामंडळाचा सहभाग आहे. आता तरुणाईची आवड लक्षात घेऊन ‘सनबर्न फेस्टिव्हल’ आयोजित करण्यात आला आहे.’ ‘कंपनीच्या वतीने गोव्यात गेल्या दहा वर्षांपासून हा महोत्सव आयोजित करण्यात येत होता. पुण्यातील महोत्सवामध्ये सुमारे ४० ते ५० देशांतील नागरिक सहभागी होतील. दुपारी दोन ते रात्री ९.५५ या वेळेत तीन दिवस हा महोत्सव होणार आहे,’ असे परसेप्ट कंपनीचे मनोज अगरवाल यांनी सांगितले.

३५ घराण्यांचे वंशज पुण्यात वास्तव्यास
मुंबईत अरबी समुद्रामध्ये छत्रपती श्री शिवाजी महाराजांचे स्मारक उभारण्याच्या प्रकल्पाचे २४ डिसेंबर रोजी पंतप्रधान नरेंद्र मोदी यांच्या उपस्थितीत जलपूजन होणार आहे. या कार्यक्रमाला ऐतिहासिक घराण्यांच्या वंशजांना विशेष अति​थी म्हणून निमंत्रित करण्यात आले आहे. संबंधित वंशजांशी संपर्क साधण्याची जबाबदारी राज्याच्या पर्यटन विभागाकडे होती. त्यानुसार ३५ घराण्यांचे वंशज हे पुण्यात वास्तवास असल्याचे निदर्शनास आले. त्यांच्याशी संपर्क साधून त्यांना निमंत्रण देण्यात आले आहे. त्यांच्यासाठी कार्यक्रमाच्या ठिकाणी ‘रॉयल बॉक्स’ असणार आहे,’ असे पर्यटनमंत्री जयकुमार रावल यांनी सांगितले.