लातूर : विधानसभा निवडणुकीच्या प्रचाराची सांगता शनिवारी लातूर जिल्ह्यात विविध पक्षाच्या उमेदवारांनी मिरवणुका काढून शक्तीप्रदर्शन करीत केली. लातूरात भाजप-शिवसेना महायुतीचे उमेदवार शैलेश लाहोटी यांच्या मिरवणुकीत बिदरचे खासदार भगवंत खुब्बा, माजी आमदार शिवाजीराव पाटील-कव्हेकर यांच्यासह घटक पक्षाचे नेते सहभागी झाले होते. दयाराम रोडवरुन निघालेल्या रॅलीचा समारोप औसा रोडवरील आदर्श कॉलनी चौकातील जाहीर सभेत करण्यात आला. कॉंग्रेस पक्षाच्या रॅलीत अभिनते रितेश देशमुख ही सहभागी झाले होते. उमेदवार अमित देशमुख आणि कॉंग्रेसचे पदाधिकारी या रॅलीत सहभागी झाले होते. हनुमान चौकातील सभेत या रॅलीचा समारोप झाला. वंचित बहुजन आघाडीचे उमेदवार राजा मणियार यांनीही रॅली काढली.
औसा मतदारसंघातील भाजपा महायुतीचे उमेदवार अभिमन्यू पवार यांच्यासाठी सिने अभिनेत्यांनी प्रचारात सहभाग घेतला. प्रिया मराठे, शंतनू मोघे, नितेश चव्हाण, पौर्णिमा डे या कलाकारांनी शनिवारी लामजना, खरोसा, रामेगाव, मदनसुरी, आलमला, आशिव, उजनी यासह औसा शहरात पदयात्रा काढल्या.