मेधा कुलकर्णी यांचा पवारांवर हल्लाबोल
म. टा. प्रतिनिधी, पुणे
'स्वातंत्र्यपूर्व काळात लॉर्ड मेकॉलेने समाजात फूट पाडली. सध्याही समाजात असमानता निर्माण करण्याचा प्रयत्न सुरूच आहे. मात्र, ही असमानता निर्माण करणाऱ्या बारामतीकरांच्या लक्षात येत नाही की, यापूर्वीही ब्राह्मण समाजाने देशाचे नेतृत्त्व केले असून यापुढेही करत राहील', अशा शब्दांत आमदार मेधा कुलकर्णी यांनी पवार कुटुंबीयांवर निशाणा साधला.
अखिल भारतीय ब्राह्मण महासंघातर्फे कृषी महाविद्यालयाच्या मैदानावर आयोजित 'ब्रह्मोद्योग-२०१८' महोत्सवात 'मातृशक्तीचा जागर' महिला मेळाव्यात त्या बोलत होत्या. या वेळी महापौर मुक्ता टिळक, आमदार शोभा फडणवीस, आमदार मनीषा कायंदे, महिला आघाडीच्या मोहिनी पत्की, अभिनेत्री मृणाल देव, राज्य सहकार परिषदेचे अध्यक्ष शेखर चरेगावकर आदी उपस्थित होते. मेळाव्यात उद्योजिका जयंती कठाळे, मोहिनीताई मोडक, आरजे शोनाली रानडे, सविता वासेकर, मंजुश्री कुलकर्णी यांना उल्लेखनीय कार्याबद्दल गौरविण्यात आले.
'संत ज्ञानेश्वरांनी पसायदान मागितले, स्वातंत्र्यवीर सावरकर, लोकमान्य टिळक यांनी देशासाठी आयुष्य झिजवले. अशा प्रकारे ब्राह्मण समाज पूर्वीपासूनच समाजासाठी झटत आला आहे', असेही कुलकर्णी यांनी नमूद केले. 'सुशिक्षित महिला राजकारणात आल्यास राजकीय आणि सामाजिक क्षेत्रात स्वच्छ वातावरण निर्माण होईल', असे मत महापौर मुक्ता टिळक यांनी मांडले. 'सध्या शहरी नक्षलवाद, दहशतवाद हे प्रश्न सतावत असून, त्यांना हद्दपार करण्यासाठी सर्वांनी एकत्र यावे', असे आवाहन शोभा फडणवीस यांनी केले. 'मी टू' चळवळीमुळे महिला बोलू लागल्या असून त्यांच्या पाठीशी उभे राहण्याची गरज मनीषा कायंदे यांनी व्यक्त केली, तर 'महिलांनी 'सूपरवुमन' होण्याच्या मागे न लागता मूल्य व तत्त्वांची कास धरावी' असा सल्ला अभिनेत्री मृणाल कुलकर्णी यांनी दिला.
तत्पूर्वी, महापौरांच्या हस्ते ब्राह्मण उद्योजकांच्या प्रदर्शनाचे उद्घाटन करण्यात आले. या वेळी अखिल भारतीय ब्राह्मण महासंघाचे राष्ट्रीय अध्यक्ष गोविंद कुलकर्णी, पंडित वसंतराव गाडगीळ, नानासाहेब चितळे, भाजप नेत्या शोभा उपाध्याय, डॉ. जितेंद्र जोशी,उदय शहा, संदीप खर्डेकर आणि आनंद दवे आदी उपस्थित होते.