म. टा. प्रतिनिधी, पुणे
कृषी उत्पन्न बाजार समितीच्या पंचवार्षिक निवडणुकीसाठी १५ गण पाडण्यात आले आहेत. त्यापैकी पाच गणांची आरक्षण सोडत लॉटरी पद्धतीने सोमवारी काढण्यात आली.
लोणीकंद-पेरणे आणि लोणीकाळभोर-थेऊर हे दोन गण महिलांसाठी राखीव झाले आहेत. पिंपरी-चिंचवड हा गण अनुसूचित जाती आणि अनुसूचित जमातीसाठी राखीव झाला आहे. हडपसर-मांजरी बुद्रुक हा गण इतर मागास वर्ग प्रवर्गासाठी, तर खेड शिवापूर हा गण विमुक्त जाती आणि भटक्या जमातीसाठी आरक्षित झाला आहे. अन्य गणांपैकी मुठा, माले, पौड, घोटावडे, पिरंगुट, माण-लवळे, वाघोली-लोहगाव, वाडेबोल्हाई-आष्टापूर, उरुळी कांचन आणि खडकवासला हे दहा गण सर्वसाधरण प्रवर्गासाठी राखीव झाले आहेत.
'बाजार समितीच्या सचिवांनी या बाजार समितीच्या क्षेत्रातील गावांची यादी जिल्हा सहकारी उपनिबंधकांमार्फत जिल्हाधिकारी कार्यालयाकडे पाठविली आहे. या गावांतील शेतकरी खातेदारांची संख्या विचारात घेऊन १५ गण पाडण्यात आले आहेत. त्यापैकी पाच गणांची आरक्षण सोडत ही लॉटरी पद्धतीने काढण्यात आली,' असे उप जिल्हा निवडणूक अधिकारी मृणालिनी सावंत यांनी सांगितले.