म. टा. प्रतिनिधी, पुणे
उत्तमनगर येथील मोरे पेट्रोल पंपावर जमा झालेली सव्वादोन लाखांची रोकड बँकेत भरण्यासाठी दिल्यानंतर कामगाराने ती घेऊन पोबारा केल्याचा प्रकार समोर आला आहे. या प्रकरणी एकावर गुन्हा दाखल करण्यात आला आहे.
या बाबत शुभम पिवाल (वय २४, रा. उत्तमनगर) यांनी तक्रार दिली आहे. त्यानुसार, नीरज विनोद पांडे (वय ३१, रा. कोपरेगाव. ता. हवेली) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, शिवणे येथे एचपी कंपनीचा कालिदास हरिभाऊ मोरे यांचा पेट्रोल पंप आहे. तेथे पांडे नोकरी करतो. पेट्रोल पंपावर जमा झालेली रोकड दररोज बँकेत भरण्याते येते. नीरज याच्याकडे शुक्रवारी दुपारी पेट्रोल पंपावर जमा झालेली दोन लाख ३१ हजार रुपयांची रोकड बँकेत भरण्यासाठी दिली होती. मात्र, रोकड बँकेत न भरताच तो पळून गेला. बराच वेळ झाल्यानंतरही नीरज परत न आल्याने मोरे यांनी बँकेत चौकशी केली. त्या वेळी त्याने बँकेत रोकड भरली नसल्याचे नसल्याचे उघड झाले. त्यानंतर मोरे यांनी नीरजचा शोध घेण्याचा प्रयत्न केला असता तो सापडला नाही. त्यानंतर मोरे यांनी पोलिसांकडे धाव घेऊन तक्रार दिली. या प्रकरणी सहायक निरीक्षक बी. बी. पिंगळे तपास करत आहे.