यकृत दानामुळे रुग्णाला जीवनदान
म टा...
म. टा. प्रतिनिधी, पुणे
लिव्हर सिरॉसिसच्या आजाराने त्रस्त असलेल्या एका ५४ वर्षांच्या ज्येष्ठाला कोल्हापूरच्या २४ वर्षीय ब्रेनडेड तरुणाचे यकृत मिळाल्याने जीवनदान मिळाले. ग्रीन कॉरिडॉरच्या माध्यमातून अवघ्या तीन तासांत यकृत पुण्यात आणण्यात आले आहे.
पुण्यातील डेक्कन येथील सह्याद्री हॉस्पिटलमध्ये यकृत प्रत्यारोपणाची ही प्रक्रिया यशस्वी झाली. कोल्हापूर येथील तरुणाच्या मेंदूला गंभीर इजा झाली होती. त्याच्यावर तेथील खासगी हॉस्पिटलमध्ये उपचार सुरू होते. उपचार सुरू असताना तो ब्रेनडेड झाला. त्याच्या नातेवाइकांचे समुपदेश करण्यात आले. त्यानंतर त्याच्या नातेवाइकांनी अवयवदान करण्याची तयारी दाखविली. त्यानंतर सह्याद्री हॉस्पिटलच्या तज्ज्ञांनी शनिवारी दुपारी यकृत काढून ते ग्रीन कॉरिडॉरच्या माध्यमातून पुण्यात आले. कोल्हापूर ते पुणे असा प्रवास तीन तासांत ग्रीन कॉरिडॉरमुळे शक्य झाला. सह्याद्री हॉस्पिटलचे यकृत प्रत्यारोपण तज्ज्ञ डॉ. बिपीन विभुते यांच्या नेतृत्वाखाली तज्ज्ञ डॉक्टरांनी यकृत प्रत्यारोपण पूर्ण केले. त्यांच्यासह डॉ. दिनेश झिरपे, डॉ. अनिरुद्ध भोसले, भूलतज्ज्ञ डॉ. मनीष पाठक, डॉ. मनोज राऊत यांनी प्रत्यारोपणाची प्रक्रिया यशस्वी केली. क्लिनिशिअन डॉ. अभिजित माने, प्रत्यारोपण समन्वयक राहुल तांबे व अरुण अशोकाने, वैद्यकीय सामाजिक कार्यकर्त्या शर्मिला पाध्ये यांनी महत्त्वाची भूमिका बजावली.
'भोसरीतील एका ५४ वर्षांच्या रुग्णाला दोन्ही मूत्रपिंडांना सूज आली होती. त्यामुळे यकृत प्रत्यारोपण करणे आवश्यक होते. ब्रेनडेड युवकाच्या नातेवाइकांनी अवयवदानाचा निर्णय घेतल्याने यकृत उपलब्ध झाले. त्यामुळे यकृत प्रत्यारोपण करणे शक्य झाले. प्रत्यारोपण यशस्वी झाले असून ज्येष्ठाला जीवनदान मिळाले आहे,' अशी माहिती यकृत प्रत्यारोपण तज्ज्ञ डॉ. दिनेश झिरपे यांनी दिली.
---
अवयवाच्या प्रत्यारोपणाबाबत नागरिकांमध्ये जागरूकता वाढणे गरजेचे आहे. अवयवाची गरज असणारे पेशंट आणि अवयवदाते यांच्या संख्येत अजूनही प्रचंड तफावत आहे. जास्तीत जास्त नागरिकांनी अवयवदानाचा संकल्प करणे आवश्यक आहे.
- डॉ. केतन आपटे, युनिट प्रमुख, सह्याद्री हॉस्पिटल