‘लोकसेवा’च्या खातेदारांना एक लाख रुपये मिळणार

येत्या एक सप्टेंबरपासून वाटपाला सुरुवात

म. टा. प्रतिनिधी, पुणे
आर्थिक अडचणीत सापडलेल्या लोकसेवा सहकारी बँकेच्या सर्व प्रकारच्या खातेदारांसाठी रक्कम काढण्याची मर्यादा ५० हजार रुपयांवरून एक लाख रुपयांपर्यंत वाढविण्यात आली आहे. एक सप्टेंबरपासून रकमेच्या वाटपाला सुरुवात होणार आहे. बँकेच्या प्रशासकीय मंडळाने हा निर्णय घेतल्याचे मंडळाचे अध्यक्ष विद्याधर अनास्कर यांनी सांगितले.
लोकसेवा बँकेवर रिझर्व्ह बँकेने (आरबीआय) १९ मे २०१४ रोजी आर्थिक निर्बंध लादले. त्यानंतर बँकेच्या सर्व प्रकारच्या खातेदारांना केवळ एक हजार रुपयांची रक्कम फक्त एकदाच काढण्याची मुभा देण्यात आली होती. २१ मार्च रोजी नवीन प्रशासकीय मंडळ आल्यानंतर एक जुलै २०१६पासून ‘आरबीआय’च्या परवानगीने ५० हजार रुपयांपर्यंतच्या रकमेचे वाटप करण्यास सुरुवात करण्यात आली. त्यानुसार आतापर्यंत तीन हजार ३०० खातेदारांना सुमारे नऊ कोटी १८ लाख रुपयांचे वाटप करण्यात आले आहे. खातेदारांना रक्कम काढण्याची मर्यादा आतापर्यंत ५० हजार रुपये होती. ती आता वाढवून एक लाख रुपयांपर्यंत नेण्यात आली आहे. या रकमेचे वाटप १ सप्टेंबरपासून केले जाणार असल्याचे अनास्कर यांनी स्पष्ट केले.
बँकेने यापूर्वी अडचणीतील असलेल्या एक हजार ४२६ ठेवीदारांना ‘आरबी​आय’च्या परवानगीने एक लाख रुपयांचे वाटप केले. आता ही सवलत सर्व खातेदारांना मिळणार आहे. बँकेचे १५ हजार ५५५ ठेवीदार असून, त्यापैकी १३ हजार २३० खातेदारांच्या एक लाख रुपयांपर्यंतच्या ठेवी आहेत. त्यांना सर्व रक्कम मिळू शकणार असल्याचेही अनास्कर म्हणाले. ‘ठेवीदारांना रक्कम मिळण्यासाठी अर्ज भरावा लागणार आहे. अर्ज सकाळी ११ ते दुपारी दोन या कालावधीत स्वीकारले जातील. दुपारी तीन ते सहा या कालावधीत चेकचे वाटप करण्यात येईल,’ असे त्यांनी नमूद केले. लोकसेवा बँकेचे दुसऱ्या सक्षम बँकेत विलीनीकरण करण्याचे प्रयत्न सुरू असल्याची माहितीही त्यांनी दिली.