वेगळा विदर्भ भाजपच्या अजेंड्यावर नाही : भांडारी

वेगळा विदर्भ भाजपच्या अजेंड्यावर नाही : भांडारी

म. टा. प्रतिनिधी, पुणे
‘विकासासाठी छोटी राज्ये असावीत, अशी भाजपची भूमिका असली, तरी सध्या वेगळ्या विदर्भाबाबत लोकभावना तीव्र नाही. त्यामुळे सध्या वेगळा विदर्भ भाजपच्या अजेंड्यावर नाही,’ असे भाजपचे प्रवक्ते माधव भांडारी यांनी शनिवारी स्पष्ट केले.
बाळासाहेब भारदे प्रतिष्ठानतर्फे आयोजित ‘महाराष्ट्र - संयुक्त की विभक्त' या विषयावरील चर्चासत्रात भांडारी बोलत होते. लोकसभेचे माजी अध्यक्ष मनोहर जोशी, कॉँग्रेसचे माजी आमदार उल्हास पवार, विदर्भातील नेते नानाभाऊ एंबडवार, महाराष्ट्र गांधी स्मारक ट्रस्टचे डॉ. कुमार सप्तर्षी आणि प्रतिष्ठानचे कार्याध्यक्ष अजय भारदे या वेळी उपस्थित होते.
‘वेगळ्या विदर्भाबाबतची लोकभावना पूर्वी तीव्र होती. आता या मागणीचा जोर उतरला आहे. स्वतंत्र विदर्भ झालाच पाहिजे असे म्हणणाऱ्यांच्या संख्येबाबत शंका आहे. राज्यकर्त्यांनी केवळ आपापल्या भागाचा विचार केला. त्यामुळे विकासात असमतोल निर्माण झाला. विदर्भातील नागरिकांच्या विकासाच्या प्रेरणेला सत्ताधाऱ्यांनी प्रतिसाद दिला तर वेगळ्या विदर्भाचा प्रश्न निर्माण होणार नाही,’ असे भांडारी यांनी सांगितले.
‘वेगळ्या विदर्भाची मागणी ही सर्वसामान्य जनतेची नसून स्पर्धेला घाबरणाऱ्या व्यापाऱ्यांची आहे. विदर्भाच्या मागण्या अवाजवी नाहीत. विदर्भाला विकासाच्या मार्गावर नेण्यासाठी तेथील जनता ताकदच दाखवत नाही. सध्याच्या परिस्थितीत आंदोलन आणि चळवळींशिवाय काहीही मिळत नाही,’ असे जोशी यांनी स्पष्ट केले. ‘वैदर्भीय नेत्यांनी यशवंतराव चव्हाण यांच्या भावनिक ऐक्याच्या आवाहनाला पाठिंबा दिला. संयुक्त महाराष्ट्रानंतर वेगळ्या विदर्भाची मागणी पूर्ण करतील, अशी आशा होती,’ असे एंबडवार यांनी स्पष्ट केले.