दुमजली पुलासाठी मान्यता

अभिनव चौकातील काम ‘महामेट्रो’ करणार; रक्कम देण्यास विरोधकांची हरकत

म. टा. प्रतिनिधी, पुणे

कर्वे रस्त्यावरील अभिनव चौकातील (नळस्टॉप चौक) दुमजली उड्डाणपुलाचे काम ‘महाराष्ट्र मेट्रो रेल कॉर्पोरेशन लिमिटेड’ने (महामेट्रो) करण्यास महापालिकेच्या सर्वसाधारण सभेने मान्यता दिली. दरम्यान, ‘महामेट्रो’ला मेट्रोसाठी महापालिका ५० टक्के रक्कम देत असताना पुन्हा त्यासाठी लागणारे पूल बांधण्यास पैसे देण्याची आवश्यकता का, असा सवाल विरोधकांनी उपस्थित केला आहे.
नळस्टॉप चौकातील नियोजित बहुमजली पुलाचा आराखडा, ‘स्ट्रक्चरल डिझाइन’ आणि बांधकाम महामेट्रोला करण्यास मंजुरी देणारा प्रस्ताव स्थायी समितीच्या बैठकीत मान्य करण्यात आला होता. हा प्रस्ताव मुख्यसभेत मंजुरीसाठी आल्यानंतर विरोधकांनी महापालिकेने निधी का द्यायचा, असा सवाल उपस्थित केला. महामेट्रोसाठी महापालिका ५० टक्के निधी देणार आहे. मोक्याचे भूखंड मेट्रोसाठी देण्यात येत आहेत. मेट्रोने डीपीआर करताना या बहुमजली पुलांचा विचार का केला नव्हता? मेट्रोने काम सुरू करण्यापूर्वीच महापालिकेकडे पैसे मागण्यास सुरुवात केली असून, ही धोक्याची घंटा असल्याची टीका विरोधी पक्षनेते चेतन तुपे यांनी केली.
कर्वे रस्त्यावरून वनाज ते रामवाडीच्या मेट्रो मार्गाचे काम सुरू होणार असून, ते करतानाच इतर सर्व वाहनांसाठी उड्डाणपूल उभारण्यात येणार आहे. जयपूर आणि नागपूरनंतर आता पुण्यातही उड्डाणपूल आणि मेट्रो एकाच ‘पिलर’वर होण्याची चिन्हे आहेत. स्थायी समितीचे अध्यक्ष मुरलीधर मोहोळ यांनी अर्थसंकल्पात या दुहेरी उड्डाणपुलासाठी तीन कोटी रुपयांची तरतूद केली आहे. त्यानुसार या पुलाचे काम ‘महामेट्रो’ने करण्यास स्थायी समितीने मंजुरी दिली आहे. या पुलाच्या बांधकामाचा खर्च पालिका करणार आहे. त्यासाठी पालिकेच्या अर्थसंकल्पात टप्प्याटप्प्याने तरतूद करण्यासही ‘स्थायी’ने मंजुरी दिली आहे.
मेट्रोसाठी पिलर उभारतानाच, उड्डाणपुलाची रचना करणेही शक्य होणार आहे. या पार्श्वभूमीवर या ठिकाणचा उड्डाणपूल बांधण्याचे काम ‘महामेट्रो’ला देण्याचा निर्णय घेण्यात आला आहे. नळस्टॉप चौकात लॉ कॉलेज रस्ता, कर्वे रस्ता, म्हात्रे पुलाकडून तसेच पौड रस्त्याकडून चौकात येणारी वाहनांमुळे कोंडी होते. या उड्डाणपुलामुळे कर्वे आणि पौड रस्त्यावरील वाहतूक दुहेरी मार्गाने पुलावरून नेण्याचे नियोजन आहे. त्यामुळे नळस्टॉप चौकातील वाहतूक सुरळीत होईल, असा पालिकेचा दावा आहे. करारानंतर कामाच्या स्वरुपानुसार तीन कोटी रुपये ‘महामेट्रो’ला देण्यात येतील.

निर्णय एका दृष्टिक्षेपात
- उड्डाणपुलाचा आराखडा, स्ट्रक्चरल डिझाइन आणि बांधकाम करण्यास महामेट्रोला मंजुरी देण्यात आली.
-उड्डाणपुलाचा खर्च पालिका ‘महामेट्रो’ला देणार.
- खर्चासाठी पालिका अर्थसंकल्पात टप्प्याटप्प्याने तरतूद करणार.