व्हॉट्सॲप ग्रुपवर भांडण, मध्यस्थी करणाराच गोत्यात, पुण्यात बिल्डरच्या गोळीबारात जखमी

पुणे : व्हॉट्सॲप ग्रुपवरच्या चॅटिंगवरून झालेल्या बाचाबाचीत एका बांधकाम व्यावसायिकाने एकावर भरदिवसा गोळीबार केला. ही धक्कादायक घटना पुणे शहरातील सिंहगड रस्ता पोलीस ठाण्याच्या हद्दीत घडली आहे. विशेष म्हणजे गोळीबार झालेल्या ठिकाणापासून सिंहगड पोलीस ठाणे अक्षरशः हाकेच्या अंतरावर आहे.

या गोळीबारामध्ये रमेश राठोड (रा. वारजे, पुणे) हे जखमी झाले असून त्यांना जवळच्या रुग्णालयात उपचारासाठी दाखल करण्यात आले आहे. या प्रकरणी संतोष पवार (रा. बावधन, पुणे) यांना पोलिसांनी ताब्यात घेतले आहे.

घटनास्थळी मिळालेल्या माहितीनुसार, देवा राठोड यांनी आपल्या समाजाच्या व्हॉट्सॲप ग्रुपवर संतोष पवार यांच्याबद्दल आक्षेपार्ह मजकूर लिहिला होता. या कारणावरुन संतोष पवार व देवा राठोड यांच्यात बाचाबाची झाली. हा वाद मिटवण्यासाठी संतोष पवार, देवा राठोड व रमेश राठोड यांच्यासह अन्य काही जण सिंहगड रस्ता परिसरातील सनसिटी भागातील योगीराज ऑटो सेंटरमध्ये चर्चा करण्यासाठी आले होते.

दरम्यान या ठिकाणी दोघांमधील वाद मिटण्याऐवजी उलट उफाळून आला. या भांडणात रमेश राठोड हे मध्ये पडल्याने संतोष पवार यांनी कमरेला असणारी पिस्तूल काढून रमेश राठोड यांच्या दिशेने गोळीबार केला. यात रमेश राठोड यांच्या पायाला गोळी लागल्याने ते जखमी झाले आहेत.

हेही वाचा : हळदी कुंकवासाठी मैत्रिणींना बोलावलं, खरेदीहून येताना अपघात, महिला पोलिसाचा दुर्दैवी मृत्यू

घटनेची माहिती मिळताच सिंहगड रस्ता विभागाचे सहायक पोलिस आयुक्त राजेंद्र गलांडे, वरिष्ठ पोलीस निरीक्षक शैलेश संखे, पोलीस निरीक्षक (गुन्हे) जयंत राजुरकर व कर्मचाऱ्यांनी तत्काळ घटनास्थळी धाव घेतली. पुढील तपास सिंहगड रस्ता पोलीस करीत आहेत.

हेही वाचा : अर्धांगिनीचा विरह सोसेना! पत्नीच्या तेराव्याला पतीचा मृत्यू, लेकरांना जीवनमंत्र देत बाबांनी जीव सोडला