म. टा. प्रतिनिधी, पुणे
नाट्यगृहे खुली होऊन वीस दिवस होत आले, तरी एकही नाट्यप्रयोग होऊ शकलेला नाही. मार्च २०२१ पर्यंतचे थिएटर बुकिंग सुरू झाले आहे. मात्र, अद्याप एकाही संस्थेने नाटकासाठी नोंदणी केलेली नाही. करोना काळातील पहिला नाट्यप्रयोग कदाचित पुण्यात होण्याची शक्यता आहे. मात्र, पन्नास टक्के प्रेक्षकांच्या उपस्थितीत प्रयोगाचा खर्च आणि डोलारा कसा सांभाळायचा, ही काळजी नाट्यसंस्थांना लागली आहे.
रंगभूमी दिनाच्या पूर्वसंध्येला (४ नोव्हेंबर) ५० टक्के क्षमतेने नाट्यगृह आणि चित्रपटगृह सुरू करण्यास सरकारने परवानगी दिली. 'नाट्यगृहे खुली, पण सांस्कृतिक कार्यक्रमांवर बंदी' हा राज्य सरकारच्या धोरणातील गोंधळ महापालिका प्रशासनाने कायम ठेवला. शहरातील नाट्यगृहे, सभागृहे तसेच थिएटर उघडण्यास परवानगी दिली असली, तरी दिवाळी पहाट व अन्य सांस्कृतिक कार्यक्रमांच्या आयोजनावर पालिकेने बंदी घातली होती. नाट्यगृहांमध्ये कार्यक्रम आयोजित करायचे नसतील तर ते उघडण्याचे कौतुक तरी कशाला, अशी प्रतिक्रिया सांस्कृतिक क्षेत्रातून उमटत होती. विधानपरिषदेच्या निवडणुकीच्या आचारसंहितेमुळे नाट्यगृहांच्या स्वच्छतेसाठी निविदा प्रक्रिया काढता येत नसल्याने स्वच्छतेची कामे रखडली होती. महापालिका प्रशासनाने कर्मचाऱ्यांच्या मदतीने स्वच्छतेची कामे सुरू ठेवली आहेत. दुसरीकडे नाट्यगृहाचे बुकिंग सुरू झाले आहे. मात्र त्यास प्रतिसाद मिळालेला नाही. महापालिकेच्या नाट्यगृहांमध्ये राजकीय मेळावे होत असताना सांस्कृतिक कार्यक्रम आणि नाट्यप्रयोग याची प्रतीक्षा कायम आहे.
'नाट्यगृहांची स्वच्छतेची कामे सुरू आहेत. मार्च २०२१ पर्यंतची नोंदणी सुरू केली आहे. डिसेंबर महिन्यात नाट्यसंस्थांनी प्रयोग आयोजित करावे यासाठी जागृती करीत आहोत. मात्र, प्रतिसाद मिळालेला नाही. पन्नास टक्के प्रेक्षकांच्या उपस्थितीत प्रयोग झाला तर खर्च भरून निघेल का, अशी शंका संस्थांना आहे. खासगी संस्थांसाठी सुमारे १७ हजार आणि नाट्यसंस्थांसाठी सुमारे साडेतीन हजार रुपये इतके शुल्क आहे. सांस्कृतिक क्षेत्राच्या आग्रहानुसार नाट्यगृहे खुली झाली आहेत. आता नाट्यसंस्थांनी प्रयोगासाठी पुढे यावे,' असे रंगमंदिराचे व्यवस्थापक सुनील मते यांनी सांगितले.
नाट्यगृहे खुली झाल्यापासून राज्यात एकही नाट्यप्रयोग झालेला नाही. मुंबईच्या आधी पुण्यात नाट्यप्रयोग होण्याची शक्यता आहे. करोना काळातील हा पहिला नाट्यप्रयोग असेल. पन्नास टक्के प्रेक्षकांच्या उपस्थितीत प्रयोगाचा खर्च परवडेल का, असा प्रश्न असला, तरी नाट्यसंस्कृतीसाठी प्रयोग होणे आवश्यक आहे. दोन-तीन दिवसांत याबाबतीत निर्णय होईल.
- समीर हंपी, नाट्यव्यवस्थापक
नाट्यगृहे खुली होऊन वीस दिवस होत आले, तरी एकही नाट्यप्रयोग होऊ शकलेला नाही. मार्च २०२१ पर्यंतचे थिएटर बुकिंग सुरू झाले आहे. मात्र, अद्याप एकाही संस्थेने नाटकासाठी नोंदणी केलेली नाही. करोना काळातील पहिला नाट्यप्रयोग कदाचित पुण्यात होण्याची शक्यता आहे. मात्र, पन्नास टक्के प्रेक्षकांच्या उपस्थितीत प्रयोगाचा खर्च आणि डोलारा कसा सांभाळायचा, ही काळजी नाट्यसंस्थांना लागली आहे.
रंगभूमी दिनाच्या पूर्वसंध्येला (४ नोव्हेंबर) ५० टक्के क्षमतेने नाट्यगृह आणि चित्रपटगृह सुरू करण्यास सरकारने परवानगी दिली. 'नाट्यगृहे खुली, पण सांस्कृतिक कार्यक्रमांवर बंदी' हा राज्य सरकारच्या धोरणातील गोंधळ महापालिका प्रशासनाने कायम ठेवला. शहरातील नाट्यगृहे, सभागृहे तसेच थिएटर उघडण्यास परवानगी दिली असली, तरी दिवाळी पहाट व अन्य सांस्कृतिक कार्यक्रमांच्या आयोजनावर पालिकेने बंदी घातली होती. नाट्यगृहांमध्ये कार्यक्रम आयोजित करायचे नसतील तर ते उघडण्याचे कौतुक तरी कशाला, अशी प्रतिक्रिया सांस्कृतिक क्षेत्रातून उमटत होती. विधानपरिषदेच्या निवडणुकीच्या आचारसंहितेमुळे नाट्यगृहांच्या स्वच्छतेसाठी निविदा प्रक्रिया काढता येत नसल्याने स्वच्छतेची कामे रखडली होती. महापालिका प्रशासनाने कर्मचाऱ्यांच्या मदतीने स्वच्छतेची कामे सुरू ठेवली आहेत. दुसरीकडे नाट्यगृहाचे बुकिंग सुरू झाले आहे. मात्र त्यास प्रतिसाद मिळालेला नाही. महापालिकेच्या नाट्यगृहांमध्ये राजकीय मेळावे होत असताना सांस्कृतिक कार्यक्रम आणि नाट्यप्रयोग याची प्रतीक्षा कायम आहे.
'नाट्यगृहांची स्वच्छतेची कामे सुरू आहेत. मार्च २०२१ पर्यंतची नोंदणी सुरू केली आहे. डिसेंबर महिन्यात नाट्यसंस्थांनी प्रयोग आयोजित करावे यासाठी जागृती करीत आहोत. मात्र, प्रतिसाद मिळालेला नाही. पन्नास टक्के प्रेक्षकांच्या उपस्थितीत प्रयोग झाला तर खर्च भरून निघेल का, अशी शंका संस्थांना आहे. खासगी संस्थांसाठी सुमारे १७ हजार आणि नाट्यसंस्थांसाठी सुमारे साडेतीन हजार रुपये इतके शुल्क आहे. सांस्कृतिक क्षेत्राच्या आग्रहानुसार नाट्यगृहे खुली झाली आहेत. आता नाट्यसंस्थांनी प्रयोगासाठी पुढे यावे,' असे रंगमंदिराचे व्यवस्थापक सुनील मते यांनी सांगितले.
नाट्यगृहे खुली झाल्यापासून राज्यात एकही नाट्यप्रयोग झालेला नाही. मुंबईच्या आधी पुण्यात नाट्यप्रयोग होण्याची शक्यता आहे. करोना काळातील हा पहिला नाट्यप्रयोग असेल. पन्नास टक्के प्रेक्षकांच्या उपस्थितीत प्रयोगाचा खर्च परवडेल का, असा प्रश्न असला, तरी नाट्यसंस्कृतीसाठी प्रयोग होणे आवश्यक आहे. दोन-तीन दिवसांत याबाबतीत निर्णय होईल.
- समीर हंपी, नाट्यव्यवस्थापक