...तर 'त्या' पोलीस कर्मचाऱ्यांना बडतर्फ करणार

म. टा. प्रतिनिधी, पुणे: लॉकडाऊनमध्ये (Maharashtra Lockdown) महामार्गावर वाहनचालकांची अडवणूक करून पैसे वसूल केले जात असल्याच्या तक्रारी येत आहे. याबद्दल मुख्यमंत्री उद्धव ठाकरे यांनी पोलीस महासंचालकांकडे नाराजी व्यक्त केली होती. त्यामुळे आता महामार्गावर अडवणूक करून पैसे वसूल केल्यास संबंधित पोलीस अधिकारी आणि कर्मचाऱ्यांना थेट बडतर्फ केले जाईल, असे आदेशच वाहतूक विभागाच्या अतिरिक्त पोलीस महासंचालकांनी दिले आहेत.

लॉकडाऊनमध्ये अनेक ठिकाणी नागरिक, मजूर आणि कामगार अडकले आहेत. पुणे-मुंबई द्रुतगती मार्गावर दोन वाहने रखडली होती. ती सोडण्यासाठी एका पोलीस अधिकाऱ्याने प्रत्येक वाहनासाठी १० हजार रुपये असे एकूण २० हजार रूपयांची मागणी केली होती. त्यानंतर वीस हजार रूपयांची लाच घेताना त्या अधिकाऱ्याला अटक केली होती. त्यानंतर महामार्गावर नागरिकांच्या अडवणुकीचे काही प्रकार समोर आले होते. तसेच, काही जणांनी थेट मुख्यमंत्री उद्धव ठाकरे यांच्याकडे तक्रारी केल्या होत्या. अशा घटना कानावर आल्यानंतर मुख्यमंत्र्यांनी थेट पोलीस महासंचालकांकडे या घटनांबाबत नाराजी व्यक्त केली होती. तसेच, अशा घटना पुढे घडू नयेत, अशा सूचना दिल्या होत्या. त्यानंतर महासंचालकांनी वाहतूक विभागाचे अतिरिक्त महासंचालक यांना या प्रकरणात लक्ष घालण्यास सांगितले होते.

लॉकडाऊनमुळे सध्या अनेक वाहनचालक परवाने घेऊन जात आहेत. तर, काही जण विनापरवाना बाहेर पडत आहेत, तर काही नागरिक पायी जात आहेत. अशा नागरिकांना त्रास होणार नाही, याची दक्षता पोलीस विभागाकडून घेतली आहे. राज्याचे वाहतूक विभागाचे अतिरिक्त महासंचालक विनय कारगावकर यांनी सर्व महामार्गांवर असे प्रकार घडू नयेत, याबाबत दक्षता घेण्याचे आदेश दिले आहेत. तसेच, अशा प्रकारे कोणी अडवणूक केली तर त्यांच्यावर निलंबनाऐवजी थेट बडतर्फीची कारवाई केली जाईल, अशी ताकीद दिली आहे. अतिरिक्त महासंचालकांनी आदेश दिल्यानंतर संबधित विभागाच्या अधीक्षकांनी आदेश काढून त्यांच्या हद्दीतील पोलिसांना ताकीद दिली आहे.

पोटात भूक; उरात भीती

घरवापसीला वेग; पुणे विभागातून उद्या एकाच दिवशी सुटणार ७ ट्रेन