‘जीएसटी’विषयक विशेष कार्यक्रम

तज्ज्ञांच्या उपस्थितीत शंकानिरसनाची संधी

म. टा. प्रतिनिधी, पुणे

गुड्स अँड सर्व्हिस टॅक्स हा तसा गुंतागुंतीचा विषय...मात्र, तो नेमका गुड आणि सिंपल कसा आहे, हे याच विभागाच्या वरिष्ठ अधिकाऱ्यांकडून समजून घेण्याची संधी आज, शुक्रवारी पुणेकरांना मिळणार आहे. तसेच, जीएसटीविषयीच्या सर्व शंकाचे निरसनही करून घेता येणार आहे.
निमित्त आहे, ‘मटा पुणे सुपरफास्ट-जीएसटी स्पेशल’ या कार्यक्रमाचे.... आज, शुक्रवारी सायंकाळी साडेपाच वाजता कर्वे रस्त्यावरील आबासाहेब गरवारे कॉलेजच्या सभागृहात हा कार्यक्रम होईल. केंद्रीय जीएसटीच्या पुणे विभागाचे अतिरिक्त आयुक्त सुरेंद्रकुमार मानकोसकर आणि उपायुक्त राजलक्ष्मी कदम उपस्थितांना मार्गदर्शन करणार आहेत. शिवाय उपस्थितांच्या प्रश्नांना उत्तरेही देणार आहेत.
वस्तू व सेवा कर अर्थात जीएसटी नेमका आहे तरी काय, कोणत्या वस्तू किंवा सेवांकर किती कर आहे, जीएसटीसाठी नेमके किती रिटर्न भरायचे, एखाद्या वस्तूवर इनपुट क्रेडिट नेमके किती आणि कसे मिळणार, एखाद्या व्यापाऱ्याने नोंदणी केली नाही किंवा एंट्री दाखवली नाही, तर दंड कोणाला बसणार, आइस्क्रीम व सॉफ्टड्रिंक एकत्र विकले तर किती कर आकारायचा, एसी, नॉन एसी हॉटेलचे बिलिंग कसे करायचे, या आणि अशा अनेक प्रश्नांची उत्तरे या कार्यक्रमात मिळणार आहेत. आपल्याला आकारण्यात आलेला कर योग्य आहे का, आपली फसवणूक तर होत नाही ना, जीएसटीमुळे नेमके काय महाग होणार, काय स्वस्त होणार याची सामान्य
ग्राहकांना चिंता सतावत आहे. या सर्व शंका, समस्यांचे निराकरणही कार्यक्रमात होणार आहे. शहरातील विविध व्यापारी-व्यावसायिक संघटनांचे प्रतिनिधी, सदस्य, व्यापार-उदीम क्षेत्रातील मान्यवरही या वेळी उपस्थित राहणार आहेत. हा कार्यक्रम सर्वांसाठी खुला आहे.

‘मटा पुणे सुपरफास्ट- जीएसटी स्पेशल’
कुठे : आबासाहेब गरवारे कॉलेज, कर्वे रस्ता
कधी : आज, शुक्रवारी
किती वाजता : सायं. ५.३० वा.