एक्स्प्रेस वेवर प्रवाशाला बेदम मारहाण करून लुटलं

मटा ऑनलाइन वृत्त । पिंपरी

मुंबई-पुणे एक्स्प्रेस वेवर खासगी वाहनातून प्रवास करणाऱ्या प्रवाशाला बेदम मारहाण करून लुटल्याची धक्कादायक घटना घडली आहे. पंकज सुनील कदम (वय २७) असे जखमी प्रवाशाचे नाव असून शुक्रवारी रात्री देहूरोड भागात ही दुर्दैवी घटना घडली. पंकज यांच्यावर सध्या खासगी रुग्णालयात उपचार सुरू आहेत.

पोलिसांनी दिलेल्या माहितीनुसार, मुंबईला जाण्यासाठी पंकज वाकड येथून स्कॉर्पिओ या खासगी गाडीत बसले. मात्र गाडीचालकासह चार व्यक्तींनी पंकजला धारदार शस्त्राचा धाक दाखवत त्याच्याकडून मोबाईल तसेच पैसे काढून घेतले. त्यानंतर पंकजला बेदम मारहाण करून एक्स्प्रेस वेवर सोडून देत त्यांनी पळ काढला. पंकज यांनी तशाच अवस्थेत ४-५ किलोमीटर पायी चालत किवळे गाठलं, आसपासच्या परिसरातील नागरिकांनी जखमी पंकजची अवस्था पाहून त्याला खासगी रुग्णालयात दाखल केलं. दरम्यान याप्रकरणी देहूरोड पोलीस स्टेशनमध्ये अज्ञातांविरोधात गुन्हा दाखल करण्यात आला असून पुढील तपास सुरू आहे.