‘रॅक’मुळे विद्यार्थ्यांना फटका

परीक्षेत अभ्यासक्रमाला अनुरूप प्रश्न नसल्याने बहुतांश विद्यार्थी अनुतीर्ण

म. टा. प्रतिनिधी, पुणे
सावित्रीबाई फुले पुणे विद्यापीठाच्या इंजिनीअरिंग शाखेच्या निकालात मेकॅनिकल शाखेत अंतिम वर्षाला असणारे बहुतांश विद्यार्थी ‘रेफ्रिजरेशन अँड एअर कंडिशनिंग’ (रॅक) विषयात एक आणि दोन गुणांच्या फरकाने अनुत्तीर्ण झाले आहे. परीक्षेत अभ्यासक्रमाला अनुसरून प्रश्न न आल्याने इतर विषयात उत्तीर्ण होऊन विद्यार्थ्यांना केवळ ‘रॅक’मध्ये अनुत्तीर्ण व्हावे लागले आहे. विद्यापीठाच्या कार्यक्षेत्रात येणाऱ्या बहुतांश इंजिनीअरिंग कॉलेजमध्ये हा प्रश्न निर्माण झाला आहे. अनुत्तीर्ण निकालामुळे विद्यार्थ्यांच्या ‘प्लेसमेंट’ला अडथळे निर्माण झाले आहे.

विद्यापीठाने काही दिवसांपूर्वी इंजिनीअरिंगच्या सर्व शाखांची परीक्षा घेतली. त्याचा निकाल काही दिवसांपूर्वी जाहीर करण्यात आला. मेकॅनिकल शाखेच्या अंतिम वर्षातील विद्यार्थ्यांना सातव्या सत्रात ‘रॅक’ नावाचा विषय आहे. नुकत्याच जाहीर झालेल्या निकालामध्ये बहुतांश विद्यार्थी ‘रॅक’ विषयात अनुत्तीर्ण झाले आहेत. या विषयाच्या पेपरमध्ये अभ्याक्रमाला अनुरूप प्रश्न आले नाहीत, तसेच अभ्यासक्रमातील एका भागावर प्रश्नच विचारण्यात आले नाही. त्यामुळे विद्यार्थ्यांना परीक्षेत प्रश्न सोडविता आले नाही. त्यामुळे मोठ्या प्रमाणात विद्यार्थ्यांना परीक्षेत अनुत्तीर्ण व्हावे लागले, असा आरोप विद्यार्थ्यांनी केला आहे.

विशेष म्हणजे या विषयात अनुत्तीर्ण झालेले विद्यार्थी सत्रातील इतर विषयात उत्तीर्ण झाले आहेत. तसेच, गेल्या वर्षापर्यंत हेच अनुत्तीर्ण विद्यार्थी चांगल्या गुणांनी उत्तीर्ण झाले आहेत. काही विद्यार्थ्यांना तर ७२ टक्क्यांपर्यत गुण मिळाले असून केवळ एक आणि दोन गुण कमी मिळाल्याने ‘रॅक’ विषयात ते अनुत्तीर्ण झाले आहे. अनुत्तीर्ण विद्यार्थी हे अंतिम वर्षाला असल्याने त्यांना कॉलेजमध्ये ‘प्लेसमेन्ट’साठी येणाऱ्या ‘कॅम्पस’मध्ये सहभागी होता येत नसल्याची तक्रार विद्यार्थ्यांनी केली आहे.

सध्याच्या परिस्थितीत शहरातील १८०पेक्षा विद्यार्थी केवळ या विषयात अनुत्तीर्ण झाले आहेत. संबंधित प्रकाराची माहिती त्यावर विद्यापीठाचे परीक्षा नियंत्रक डॉ. अशोक चव्हाण यांना दिली असून त्यावर तातडीने कारवाई करण्याची मागणी केली असल्याचे ट्रिनिटी कॉलेज ऑफ इंजिनीअरिंगचा विद्यार्थी राजेंद्र कंदगुळे याने सांगितले.

विद्यापीठाच्या समितीत चर्चा

मेकॅनिकल शाखेच्या सातव्या सत्रात असणाऱ्या ‘रॅक’ विषयात विद्यार्थी अनुत्तीर्ण झाले असल्याची तक्रार विद्यापीठ प्रशासनाकडे आली आहे. येत्या काही दिवसांत ‘डीन’ समितीच्या होणाऱ्या बैठकीत विद्यार्थी अनुत्तीर्ण का झाले, यावर चर्चा करण्यात येईल. हा प्रश्न काही कॉलेजातील विद्यार्थ्यांचा आहे अथवा सर्व कॉलेजातील विद्यार्थ्यांचा आहे, हे पाहून योग्य तो निर्णय घेण्यात येईल, असे विद्यापीठाच्या प्रशासनाकडून सांगण्यात आले.