म. टा. वृत्तसेवा, भोर
सासरच्या छळाला कंटाळून विवाहित महिलेने राहत्या घरात विष प्रशान करून आत्महत्या केली. आत्महत्या केलेल्या महिलेच्या अडीच वर्षांच्या मुलीचा मृतदेह शेतातील विहिरीत आढळून आला. या प्रकरणी राजगड पोलिस ठाण्यात दोन वेगवेगळे गुन्हे दाखल करून आरोपींना ताब्यात घेतले आहे. मायलेकीचा घातपात केल्याचा आरोप करून माहेरकडील नातेवाइकांनी आरोपींना अटक करण्याची मागणी केली. याप्रसंगी पोलिस ठाण्यासमोर जमाव जमला होता.
नीलम मनोज थिटे (वय ३०, रा. हातवे, भिलारवाडी, ता. भोर) असे आत्महत्या केलेल्या विवाहित महिलेचे नाव आहे. तिची अडीच वर्षांची मुलगी शामवी मनोज थिटे हिचा मृतदेह शेतामधील विहिरीत आढळून आला. राजगड पोलिस ठाण्याचे अंमलदार बाबा कदम यांनी दिलेल्या माहितीनुसार, 'नीलमच्या सासरच्या शेतामधील बंद घराचा दरवाजा उघडा असल्याने शेजारील शशिकांत थिटे यांनी घरात पहिले असता, नीलम थिटे मोठमोठ्याने श्वास घेत असताना आढळून आल्या. नीलमला उपचारासाठी नसरापूर येथील सिद्धिविनायक रुग्णालयात नेले असता, मृत घोषित करण्यात आले. शेतामधील घराच्या काही अंतरावर असणाऱ्या विहिरीत शामवी मृत अवस्थेत आढळून आली. पोलिसांनी याबाबत अकस्मात आणि आत्महत्या असे दोन वेगवेगळे गुन्हे दाखल केले आहेत. पती, सासू आणि नणंद यांच्या छळाला कंटाळून आत्महत्या केल्याची फिर्याद विवाहितेचे वडील दिलीप तळेकर यांनी दिली आहे. मायलेकीच्या अंत्यसंस्काराच्या वेळी अनुचित प्रकार घडू नये, म्हणून राजगड पोलिस उपस्थित होते.