उत्कृष्ट सजावटीत ‘गोसावीपुरा’ प्रथम

महाराष्ट्र टाइम्स उत्सवमूर्ती सन्मान’च्या विजेत्यांचा गौरव

म. टा, प्रतिनिधी, पुणे
‘महाराष्ट्र टाइम्स’ आयोजित ‘महाराष्ट्र टाइम्स उत्सवमूर्ती सन्मान’ या उपक्रमाअंतर्गत घेण्यात आलेल्या विविध स्पर्धांना शहरातील गणेशोत्सव मंडळांनी उस्फूर्त प्रतिसाद दिला. उत्कृष्ट सजावट, उत्कृष्ट मूर्ती, पर्यावरणपूरक मूर्ती, लोकप्रिय गणेश मंडळ अशा विविध विभागांमध्ये घेण्यात आलेल्या स्पर्धेमध्ये शहरातील ८० हून अधिक गणेश मंडळांनी सहभाग नोंदवला.
एकूण चार विभागांमध्ये घेण्यात आलेल्या या स्पर्धेत उत्कृष्ट सजावट विभागात सोमवार पेठेतील गोसावीपुरा मंडळाने बाजी मारली. याच विभागात कॅम्पमधील श्रीकृष्ण तरुण मंडळाने द्वितीय, तर बुधवार पेठेतील महाराष्ट्र तरुण मंडळाने तिसरा क्रमांक पटकावला. उत्कृष्ट मूर्ती विभागात भवानी पेठेतील बनकर तालीम मंडळाच्या बाप्पांच्या मूर्तीने पहिला क्रमांक मिळवला. बाल शिवाजी मंडळ, दत्तवाडीने दुसरा तर, टिळक रोड सार्वजनिक गणेशोत्सव मंडळाच्या मूर्तीला तिसऱ्या क्रमांकाचे पारितोषिक मिळाले. पर्यावरणपूरक गणेशमूर्ती विभागात भवानी पेठ येथील सुभाष मंडळाच्या मूर्तीला पारितोषिक जाहीर करण्यात आले आहे. त्याचप्रमाणे यंदा १२५वे वर्ष साजरे करणाऱ्या आणि महाराष्ट्रातील भव्य मंदिरांच्या प्रतिकृतीसाठी प्रसिद्ध असलेल्या छत्रपती राजाराम मंडळास लोकप्रिय गणेश मंडळाचे पारितोषिक जाहीर करण्यात आले.
स्पर्धेसाठी आनंद सराफ, प्रसाद ठकार, शाहीर मावळे, रुपाली मावळे, शेखर कोरडे आणि स्वाती ओतारी यांनी परिक्षण केले. दर वर्षी महाराष्ट्र टाइम्सतर्फे महाराष्ट्र टाइम्स उत्सवमूर्ती सन्मान आयोजित केला जातो. त्यामध्ये विधायक कार्य करणाऱ्या गणेशोत्सव मंडळांना, तसेच नाविन्यपूर्ण सजावटी करणाऱ्या आणि पर्यावरणपूरक गणेशोत्सव साजरा करणाऱ्या मंडळांना सन्मानित केले जाते. नुकत्याच पार पडलेल्या समारंभात श्रीकृष्ण तरुण मंडळ, बनकर तालीम मंडळ, सुभाष मंडळ व राजाराम मंडळांना पारितोषिके देऊन सन्मानित करण्यात आले.