मेट्रोचे डबे पिंपरीत दाखल
म टा प्रतिनिधी, पुणे, पिंपरी शहरातील बहुप्रतीक्षित मेट्रो धावण्यासाठी आवश्यक तीन डब्यांचा (कोच) पहिला संच (ट्रेन सेट) रविवारी पिंपरीत दाखल झाला...
म. टा. प्रतिनिधी, पुणे, पिंपरी
शहरातील बहुप्रतीक्षित मेट्रो धावण्यासाठी आवश्यक तीन डब्यांचा (कोच) पहिला संच (ट्रेन सेट) रविवारी पिंपरीत दाखल झाला. येत्या दोन दिवसांत हा पहिला संच संत तुकारामनगर स्टेशनच्या जवळ प्रत्यक्ष मार्गिकेवर ठेवण्यात येणार असून, पुढील महिन्यांत त्याच्या प्राथमिक चाचण्या घेण्यात येणार आहेत.
पुणे मेट्रो प्रकल्पाच्या पिंपरी ते दापोडी या प्राधान्य मार्गावर वर्षअखेरपर्यंत मेट्रो कार्यान्वित करण्याचे उद्दिष्ट होते. महाराष्ट्र मेट्रो रेल्वे कॉर्पोरेशनला (महामेट्रो) त्यात यश मिळाले नसले, तरी ३१ डिसेंबरपूर्वी मेट्रोचे डबे प्रत्यक्ष शहरात आणून त्याची चाचणी घेण्यासाठीची सज्जता पूर्ण करण्यात आली आहे. येत्या मंगळवारी (३१ डिसेंबर) मेट्रोचे प्रत्यक्ष डबे पुणे आणि पिंपरी-चिंचवडकरांना पाहता येणार आहेत.
महामेट्रोतर्फे पिंपरीत संत तुकारामनगर स्टेशनचे काम जलदगतीने पूर्ण केले जात आहे. याच ठिकाणी मेट्रोच्या रूळांचे काम पूर्ण झाले आहे. मेट्रोसाठी विद्युतवाहक तारांचे कामही पूर्ण करण्याकडे लक्ष केंद्रित करण्यात आले आहे. पुढील काही दिवसांमध्ये मेट्रोसाठी सिग्नलिंगची व्यवस्था बसविण्यात येणार आहे. त्यानंतर पुणे मेट्रोसाठी प्रत्यक्ष चाचण्या घेतल्या जातील. जानेवारीमध्येच प्राथमिक चाचण्या घेण्याचे नियोजन 'महामेट्रो'ने केले आहे.
.
ढोलताशांच्या गजरात स्वागत
मेट्रोच्या कोचचे पिंपरी-चिंचवडमध्ये पुणे मेट्रो मित्र, पुणे मेट्रो फॅन क्लबच्या सदस्यांनी ढोलताशांच्या गजरात आणि तुतारीच्या निनादात स्वागत केले. महापौर माई ढोरे, स्थायी समिती अध्यक्ष विलास मडिगेरी यांनी कोचच्या गाडीचे स्वागत केले आणि अधिकाऱ्यांशी मेट्रोच्या पुढील कामकाजाबाबत चर्चा केली. शहराचे प्रवेशद्वार मानल्या जाणाऱ्या भक्ती-शक्ती चौकात (निगडी) मेट्रो मित्र आणि फॅन क्लबच्या सदस्यांनी पारंपरिक वेशात मेट्रो कोचचे स्वागत केले. १,४०० किलोमीटरचा प्रवास करून हे कोच पुण्यात दाखल झाले आहेत. मेट्रोचे कोच शहरात दाखल झाल्यानंतर पुणे मेट्रोचे फेसबुक पेज आणि ट्विटर हँडलवर या कोचचे फोटो टाकण्यात आले. हे फोटो मोठ्या प्रमाणात सोशल मीडियावर व्हायरल झाले. अनेक नागरिकांनी हे कोच पाहण्यासाठी गर्दी केली होती.
.
- मेट्रोचे कोच १,४०० किमीचा प्रवास करून शहरात दाखल झाले.
- महापौर माई ढोरे, स्थायी समितीचे अध्यक्ष विलास मडिगेरी यांनी मेट्रोच्या कोचचे शहरात स्वागत केले आणि मेट्रोच्या अधिकाऱ्यांशी मेट्रोच्या कामकाजाबाबत चर्चा केली.
- मेट्रो कोचचे डबे घेऊन येणाऱ्या गाड्या शहरात दाखल झाल्यानंतर ढोलताशांच्या गजरात या गाड्यांचे स्वागत करण्यात आले.