मेट्रोचे स्टेशन वेलस्ली मार्गावर

पुणे रेल्वे स्टेशन परिसरातील कोंडी टाळण्याचा महामेट्रोचा प्रयत्न
...........
@suneetMT
पुणे : पुणे रेल्वे स्टेशनच्या मुख्य प्रवेशद्वाराबाहेर आत्ताच होणारी वाहतूक कोंडी आणि भविष्यात वाढणारी संभाव्य वाहतूक लक्षात घेता, पुणे मेट्रोचे या भागातील स्टेशन मुख्य प्रवेशद्वाराऐवजी वेलस्ली मार्गावर (ल मेरीडियन हॉटेलजवळ) घेण्याचे महाराष्ट्र मेट्रो रेल्वे कॉर्पोरेशनने निश्चित केले आहे. रेल्वे प्रशासनाने त्याला नुकतीच तत्त्वतः मंजुरी दिली असून, त्यानुसार नियोजन करण्याची तयारी महामेट्रोने सुरू केली आहे.

पुणे मेट्रो प्रकल्पाचा वनाझ ते रामवाडी हा मार्ग पुणे रेल्वे स्टेशनच्या जवळून जातो. दिल्ली मेट्रो रेल्वे कॉर्पोरेशनने (डीएमआरसी) केलेल्या सविस्तर प्रकल्प अहवालामध्ये रामवाडीकडे जाणारा मेट्रोचा मार्ग मुख्य प्रवेशद्वाराजवळून दर्शविण्यात आला आहे. मात्र, या भागात रेल्वेसह एसटी बसस्थानक आणि पुणे महानगर परिवहन महामंडळाचे (पीएमपी) महत्त्वाचे स्थानक असल्याने सातत्याने वाहतूक कोंडी होते. वेगवेगळ्या उपाययोजना करूनही या भागांतील वाहतूक कोंडी दूर झालेली नाही. त्यातच, मेट्रोचे काम सुरू झाल्यावर या परिसरातील वाहतूक आणखी संथ होण्याची भीती आहे. त्यामुळे, पर्यायी मार्गांची चाचपणी केल्यानंतर मेट्रोचा मार्ग आणि स्टेशन वेलस्ली रोडच्या बाजूलाच घेण्यावर महामेट्रो आणि रेल्वेच्या वरिष्ठ अधिकाऱ्यांची सहमती झाली आहे. रेल्वे प्रशासनाने मेट्रोच्या वेलस्ली रोडवरील स्टेशनला ‘ग्रीन सिग्नल’ दिल्याने आता महामेट्रोकडून त्या दृष्टीने नियोजन सुरू केल्याची माहिती व्यवस्थापकीय संचालक ब्रिजेश दीक्षित यांनी दिली.

रेल्वेतर्फे या ठिकाणी पादचारी पुलाचे काम सुरू आहे. या पुलाचा समावेश मेट्रो स्टेशनमध्ये करून प्रवाशांना रेल्वे-मेट्रो सेवा सहज उपलब्ध व्हावी, असा प्रयत्न आहे. रेल्वेकडून आवश्यक परवानग्या मिळविण्यासाठी पाठपुरावा सुरू आहे. रेल्वेची अंतिम मान्यता मिळाल्यानंतर पुढील काम सुरू करण्यात येईल, असे दीक्षित यांनी स्पष्ट केले.

..............

विविध परवानग्या घेण्याची आवश्यकता
पुणे मेट्रो प्रकल्पासाठी किमान दोन ठिकाणी मेट्रोचा ट्रॅक रेल्वे ट्रॅकला छेदणार आहे. सर्वप्रथम खडकी येथे आणि त्यानंतर रेल्वे स्टेशन परिसरात रेल्वे ट्रॅक ओलांडण्यासाठी महामेट्रोला विविध स्तरांवरील परवानग्या घ्याव्या लागणार आहेत. स्टेशन परिसरात रेल्वेचे पाच ते सहा ट्रॅक असल्याने त्यामध्ये जाणारा वेळ कमी करण्यासाठीच मेट्रोचा मार्ग वेलस्ली रोडने नेण्याबाबत महामेट्रो-रेल्वे अधिकाऱ्यांमध्ये सविस्तर चर्चा झाली आहे.
........
धान्य गोदामाच्या जागेची संयुक्त पाहणी
पर्यायी जागा निश्चित करण्याच्या जिल्हाधिकाऱ्यांच्या सूचना

पुणे : पुणे मेट्रोच्या दोन्ही मार्गांच्या ‘इंटर-चेंज’ स्टेशनसाठी शिवाजीनगर येथील धान्य गोदामाची जागा महाराष्ट्र मेट्रो रेल्वे कॉर्पोरेशनच्या (महामेट्रो) ताब्यात मिळाल्यानंतर मंगळवारी जागेची संयुक्त पाहणी करण्यात आली. तसेच, या जागेतील विविध कार्यालयांनी पुढील दोन दिवसांत पर्यायी जागा अंतिम करावी, अशा सूचना जिल्हाधिकाऱ्यांनी दिल्या.
पिंपरी-चिंचवड ते स्वारगेट आणि वनाझ ते रामवाडी या दोन्ही मेट्रो मार्गांसह पुणे महानगर प्रदेश विकास प्राधिकरणाच्या (पीएमआरडीए) शिवाजीनगर ते हिंजवडी मेट्रो मार्गासाठी धान्य गोदामाच्या जागेवर इंटर-चेंज स्टेशन होणार आहे. त्याकरिता, ही जागा महामेट्रोसाठी अत्यंत महत्त्वाची होती. ही जागा महामेट्रोला देण्याचे आदेश सरकारने दिल्यानंतर मंगळवारी महामेट्रो आणि जिल्हाधिकारी कार्यालयाच्या अधिकाऱ्यांनी जागेची संयुक्त पाहणी केली. या पाहणीनंतर जिल्हाधिकारी सौरभ राव यांच्या उपस्थितीत आढावा बैठक घेण्यात आली. शिवाजीनगर धान्य गोदामातील विविध कार्यालयांसाठी महामेट्रोतर्फे काही जागांचे पर्याय सुचविण्यात आले आहेत. संबंधित कार्यालयांनी अद्याप जागांच्या पर्यायांना अंतिम मान्यता दिलेली नाही. त्यामुळे, पुढील दोन ते तीन दिवसांत अन्य पर्यायी जागांचा शोध घ्यावा; अन्यथा महामेट्रोने सुचविलेल्या ठिकाणीच तातडीने कार्यालय स्थलांतरित करावे, अशा स्पष्ट सूचना जिल्हाधिकाऱ्यांनी संबंधितांना दिल्या.
............
मेट्रो भवन घेणार आकार
शिवाजीनगर धान्य गोदामाच्या जागेवर ‘मेट्रो भवन’ अंतर्गत महामेट्रोचे पुण्यातील मुख्य कार्यालय उभारण्याचे नियोजन केले जात आहे. या ठिकाणी मेट्रोचे तीन मार्ग एकत्र येणार आहेत. त्यामध्ये, पिंपरीहून स्वारगेटकडे जाणाऱ्या मार्गाचे स्टेशन भूमिगत असेल, तर वनाझ ते रामवाडी आणि शिवाजीनगर ते हिंजवडीचे स्टेशन उन्नत (एलिव्हेटेड) स्वरूपात असेल. कोणत्याही मेट्रोने प्रवास करणाऱ्या प्रवाशांना याच ठिकाणी इतर मार्गांचा पर्याय उपलब्ध होणार असून, याच ठिकाणी प्रवाशांसाठी पीएमपीचे बस स्थानक निर्माण करण्याचा विचार आहे.
000