म्हाडा, ग्राहकांना बिल्डरकडून गंडा

म. टा. प्रतिनिधी, पुणेः सर्वसाधारण उत्पन्न गटातील नागरिकांना माफक दरात सदनिका उपलब्ध करून देण्यासाठी महाराष्ट्र गृहनिर्माण व क्षेत्रविकास प्राधिकरणाच्या योजनेतील सदनिकांचा ताबा मुदतीत न देणाऱ्या बांधकाम व्यावसायिकावर बंडगार्डन पोलिस ठाण्यात गुन्हा दाखल करण्यात आला आहे. प्रकल्प वेळेत पूर्ण होणार नाही, याची कल्पना असतानाही व्यावसायिकाने आर्थिक फायद्यासाठी प्रकल्पाचा प्रस्ताव 'म्हाडा'कडे देऊन १५ लाभार्थ्यांची आणि सरकारची सुमारे चार कोटी रुपयांची फसवणूक केल्याचे समोर आले आहे.

पंकज येवला (भूमी कन्स्ट्रक्शन, रा. स्नेहल रेसिडन्सी, चिंचवड) असे गुन्हा दाखल झालेल्या व्यावसायिकाचे नाव आहे. याबाबत विजय ठाकूर (व्यवस्थापक, म्हाडा) यांनी तक्रार दिली आहे. येवला यांचा पिंपरी-चिंचवड महापालिकेच्या हद्दीत रहाटणी येथे भूमी ब्लेसिंग हा बांधकाम प्रकल्प सुरू आहे. चार हजार चौ. मी. क्षेत्रफळापेक्षा जास्त क्षेत्रफळातील प्रकल्पात २० टक्के क्षेत्रफळावर विकसकाने 'म्हाडा'ला सदनिका उपलब्ध करून द्यायच्या आहेत. यानुसार २१ जानेवारी २०१९ रोजी भूमी ब्लेसिंग प्रकल्पातील १८ सदनिकांची लॉटरी काढण्याचा प्रस्ताव येवला यांनी सादर केला होता. जून २०१९मध्ये लाभार्थ्यांची यादी निश्चित झाल्यानंतर १५ लाभार्थ्यांना 'देकार पत्र' देण्यात आले. त्या अनुषंगाने लाभार्थ्यांना बँक कर्ज मंजूर करण्यात आले. त्यानंतर विकसकास प्रत्येक लाभार्थ्याकडून ६० ते ७० टक्के रक्कम मिळाली. रेरा कायद्यानुसार ३० सप्टेंबर २०२०पर्यंत बांधकाम पूर्ण करून सदनिकांचा ताबा लाभार्थ्यांना देणे बंधनकारक असताना अद्याप एकाही लाभार्थ्याला सदनिकेचा ताबा मिळालेला नाही.

चार कोटींची फसवणूक

बिल्डरने मुदतीत ताबा न दिल्याने या संदर्भात लाभार्थ्यांनी 'म्हाडा'कडे तक्रार दिली. येवला यांना याबाबत स्मरणपत्र पाठवण्यात आले आहे. त्यानंतरही १५ सदनिकांचा ताबा न देता लाभार्थ्यांची आणि सरकारची सुमारे चार कोटी रुपयांची फसवणूक केल्याचे फिर्यादीत म्हटले आहे.