कोरेगाव-भीमा: मिलिंद एकबोटेंना जामीन

पुणे: कोरेगाव-भीमा हिंसेप्रकरणी अटकेत असलेले समस्त हिंदू आघाडीचे कार्याध्यक्ष मिलिंद एकबोटे यांना अखेर जामीन मिळाला आहे. २५ हजार रुपयांच्या वैयक्तिक जातमुचलक्यावर पुणे सत्र न्यायालयाने त्यांना जामीन दिला आहे.

मिलिंद एकबोटे यांना कोरेगाव-भीमा हिंसेप्रकरणी २० एप्रिलपर्यंत न्यायालयीन कोठडी सुनावली होती. तत्पूर्वीच त्यांना आज सत्र न्यायालयाने जामीन दिला आहे. कोरेगाव-भीमा येथे १ जानेवारी रोजी शौर्यस्तंभाला अभिवादन करण्यासाठी गेलेल्या अनुयायांवर हल्ला करण्यास चिथावणी दिल्याचा आरोप एकबोटेंवर ठेवण्यात आला आहे. या घटनेनंतर राज्यभरात झालेल्या हिंसक आंदोलनात नऊ कोटी ६७ लाख रुपयांच्या मालमत्तांचे नुकसान झाले होते. त्यामुळे या संपूर्ण घटनेचा तपास सुरू असून अनेक प्रत्यक्षदर्शींचे जबाब नोंदवले आहेत.